Հուլիսի 2-ին` Հոգեգալստյան տոնին հաջորդող 5-րդ կիրակին` Հայրավանքի ուխտի օրը, Մայր Աթոռ Ս. Էջմիածնից` Վեհափառ Հայրապետի օրհնությամբ, Հայրավանք էր բերվել Տիրոջ Խաչափայտի Սրբազան մասունքը։
Հանդիսապետությամբ առաջնորդական տեղապահ հոգեշնորհ Տեր Պարթև վրդ. Բարսեղյանի, աղոթակցությամբ Հայրավանքի վանահայր հոգեշնորհ Տեր Բաբկեն վրդ. Սալբիյանի և թեմի քահանայից դասի մատուցվեց Սուրբ և Անմահ Պատարագ։
Պատարագիչն էր Նորատուսի հոգևոր հովիվ Արժանապատիվ Տեր Սիմեոն քհն. Հովհաննիսյանը:
Սրբազան մասունքը Հայրավանք էր բերել Մայր Աթոռի ՔԴԿ տնօրեն հոգեշնորհ Տ. Զաքարիա ծ. վրդ. Բաղումյանը, ով
հընթացս պատարագի քարոզեց ըստ օրվա խորհրդի` մաղթելով ներկա հավատացելոց Կենարար Խաչի շնոհաբեր զորությամբ գոտեպնդվել և Տիրոջ օգնականությամբ ամրանալ ու զորանալ:
Հավարտ Պատարագի` Սրբազան մասունքով եկեղեցում կատարվեց Գավառ համայնքի նորակոչիկների, ինչպես նաև` ներկա զիվորների օրհնության կարգ, որոնց իր հայրական օրհնությունը, հորդորն ու խրատը բերեց առաջնորդական տեղապահ Հոգեշնորհ Տ. Պարթև վրդ. Բարսեղյանը:
Օրը նշանավորվեց նաև Գավառ համայնքի բնակավայրերի մշակութային ՀՈԱԿ-ների սաների կողմից գեղարվեստական գեղեցիկ կատարումներով և ժողովրդական երգ ու պարով:
Սուրբ Պատարագին ներկա էին նաև Գեղարքունիքի մարզպետ Տիար Կարեն Սարգսյանը, Գավառ համայնքի ղեկավարի տեղակալները, մարզային և համայնքային իշխանությանց ներկայցուցիչներ, տարբեր համայնքներից ժամանած ուխտավորներ:
