Քրիստոնեությունը պետական կրոն ընդունելուց հետո՝ եկեղեցական-ծիսական լեզուն դեռևս շարունակում էր մնալ հունարենն ու ասորերենը, և Աստծո խոսքը շատերի սրտերին չէր հասնում։
Ահա այս պատճառով Սուրբ Մեսրոպ վարդապետը, Սուրբ Սահակ Պարթև կաթողիկոսի օրհնությամբ, ձեռնամուխ եղավ հայոց գրերի ստեղծմանը։
«Թարգմանիչներ» կոչված հոգևոր-մշակութային մեծ շարժումը, որի ակունքներում կանգնած էին Սահակ կաթողիկոսը, Մեսրոպ Մաշտոցը, Եզնիկ Կողբացին, Հովսեփ Պաղունացին, Կորյունը, Ղևոնդ Վանանդեցին և մյուսները, աննախադեպ երևույթ էր հայոց պատմության մեջ։ Նրանց շնորհիվ ամբողջությամբ թարգմանվեց Աստվածաշունչ մատյանը, որն արժանացավ «Թարգմանությունների թագուհի» տիտղոսին։
Բացվեցին դպրոցներ, սկիզբ դրվեց հայ դպրությանը, գրվեցին աղոթքներ ու շարականներ։ Սա դարձավ մեր ժողովրդի հոգևոր-մշակութային ՈՍԿԵԴԱՐԸ։
Այս օրը տոնական պատարագ է մատուցվում Արագածոտնի թեմի Օշականի Սուրբ Մեսրոպ Մաշտոց եկեղեցում, և հարյուրավոր հայորդիներ ուխտավորաբար այցելում են այդ սրբավայրը։
