Հոկտեմբերի 11-ին Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց Հայաստանի Հանրապետության Պաշտպանության նախարար Վիգեն Սարգսյանին` ուղեկցությամբ ՀՀ ԶՈՒ hոգևոր առաջնորդ Գերաշնորհ Տ. Վրթանես եպիսկոպոս Աբրահամյանի:
Ամենայն Հայոց Կաթողիկոսը, շնորհավորելով տիար Վ. Սարգսյանին, հաջողություններ մաղթեց նրան պաշտպանության նախարարի պատասխանատու պաշտոնում:
Խոսելով բանակ-հասարակություն հարաբերությունների մասին` Վեհափառ Հայրապետն ընգծեց, որ այսօր հայ ազգի յուրաքանչյուր զավակ իրեն Հայոց բանակի մասնիկը պետք է զգա և, ապրելով այդ գիտակցությամբ, իր մասնակցությունը բերի բանակաշինության ու Հայրենիքի պաշտպանության գործին: Նորին Սրբությունը հաստատեց, որ Հայոց Եկեղեցին ամեն ջանք և ամեն հնարավորություն կգործադրի այդ գիտակցության ձևավորման համար:
Իր հերթին Պաշտպանության նախարարն անդրադարձ կատարեց ազգ և բանակ հասկացությունների նույնականացման անհրաժեշտությանը` ներկայանելով բանակ-հասարակություն կապի ամրապնդման ուղղությամբ իրականացվելիք ծրագրերը: Վերջինս ընդգծեց, որ բանակը ոչ միայն պետք է լինի հասարակության հայելին, այլև դառնա նրա յուրօրինակ դարբնոցը` այս ամենում կարևոր նկատելով նաև բանակի Հոգևոր առաջնորդության և ԶՈՒ գնդերեցների առաքելությունը:
Զրույցի ընթացքում Ամենայն Հայոց Կաթողիկոսը, վերհիշելով Արցախ կատարած իր վերջին այցելությունը, գոհունակությամբ հաստատեց, որ հայ զինվորի համար բանակային ծառայությունը սոսկ պարտականություն չէ, այլ հայրենիքի պաշտպան լինելու հանձնառություն և գիտակցություն:
Վերջում Նորին Սրբությունը վերստին Պաշտպանության նախարարին մաղթեց Աստծու օրհնության ներքո պատվով իրականացնել իր առաքելությունը մեր ժողովրդի պաշտպանության և Հայրենիքի արժանավոր ապագայի կերտման համար:
