ՓՈՐՁԵՆՔ ԼԱՎԱՏԵՍ ԼԻՆԵԼ, ԿՅԱՆՔԻՆ ՆԱՅԵԼ ԱՅԼ ԱՉՔԵՐՈՎ՝ ՍԻՐՈ ԱՉՔԵՐՈՎ, ՀԱՎԱՏՔԻ ԱՉՔԵՐՈՎ, ՋԵՐՄ ՍՐՏԱԿԻՑ ՈՒ ՆՎԻՐՎԱԾ ԸՆԿԵՐՈՋ ԵՎ ԲԱՐԵԿԱՄԻ ԱՉՔԵՐՈՎ, ՄԱՆԱՎԱՆԴ ՀԻՍՈՒՍԻ ԱՉՔԵՐՈՎ:
Ըստ փիլիսոփա Պղատոնի, Սոկրատ փիլիսոփան բանտում մահից առաջ իր բարեկամներին ասել է» «Բաժանման պահը հասել է: Ես պիտի մեռնեմ, դուք պիտի ապրեք: Չգիտեմ, թե ո՞վ ավելի գոհ պիտի լինի»: Շատ հուսահատ խրատ է: Պողոս Առաքյալը Կորնթացիներին ուղղած իր առաջին նամակում ասում է. «Որովհետև այս աշխարհի իմաստությունը հիմարություն է Աստծու առաջ, քանզի գրված է, թե ինքն է, որ բռնում է իմաստուններին իրենց խորագիտության մեջ» (Ա. Կորնթ. 3:19):
Եթե հավատում ենք, չպետք է հույսներս կորցնենք, քանի որ չգիտենք, թե ե՞րբ է մեր վախճանը: Մի մտահոգվեք: Մահը մարդու վերջը չէ, մանավանդ բարի ու արդար և հավատքով մարդու համար: Պողոս Առաքյալը Եբրայեցիներին ուղղած իր նամակում ասում է. «Եվ ինչպես որ մարդկանց սահմանված է մեկ անգամ մեռնել և այնուհետև՝ դատաստան, նույնպես և Քրիստոս մեկ անգամ՝ որպես պատարագ մատուցվեց՝ շատերի մեղքերը վերացնելու համար, իսկ երկրորդ անգամ, առանց մեղքի, պիտի հայտնվի նրանց, որոնք սպասում են իրեն՝ հավատով փրկվելու համար» (Ա. Եբր. 9:27-28):
Ամենօրյա աղոթքը և մանավանդ անձանձրույթ աղոթքը նախ մեզ հոգեպես կթեթևացնի ու մեր ունեցած դժվարությունները և նեղությունները կկարողանանք հանգիստ կերպով հաղթահարել, երկրորդ՝ մեր հույսը դնելով Աստծու ողորմածության վրա, իրապես ազնվորեն պիտի շարունակենք մեր բարի և աստվածահաճո գործերը ի փառս Աստծու: Ուրեմն փորձենք լավատես լինել, կյանքին նայել այլ աչքերով՝ սիրո աչքերով, հավատքի աչքերով, ջերմ, սրտակից ու նվիրված ընկերոջ և բարեկամի աչքերով, մանավանդ Հիսուսի աչքերով:
Ուրեմն Սոկրատի նման չլինենք, այլ նույնիսկ մահվան վերջին պահին, բարին կամենանք ու փորձենք մեր շրթունքները բացել միայն և միայն օրհնության համար:
Գրառում՝ https://web.facebook.com/permalink.php?story_fbid=1866174
