Կիրակնօրյա դպրոցների ծրագիրն ուղղված է Տավուշում հոգևոր կյանքի զարթոնքին:
Մարտի 10-ին Տավուշի մարզի Աչաջուր համայնքում բացվեց առաջին կիրակնօրա դպրոցը: Ինչպես արդեն տեղեկացրել էինք Տավուշի թեմում նոր ծրագիր է սկսվել՝ «Մեկ համայնք, մեկ դպրոց»՝ հոգևոր դաստիարակության համար:
Կիրակնօրյա դպրոցների ծրագիրը, որի նախաձեռնողն ու իրականացնողը Տավուշի թեմի առաջնորդարանն է, ուղղված է Տավուշում հոգևոր կյանքի զարթոնքին: Տավուշի թեմի առաջնորդ գերաշնորհ Տեր Բագրատ Եպիսկոպոս Գալստանյանի խոսքերով. Կիրակնօրյա դպրոցների կյանքի կոչումը Տավուշում հոգևոր դաստիարակության կարևորագույն օղակն է: Այս ծրագրի շնորհիվ Տավուշի թեմում այսուհետ դպրոցական կրթությունից զատ կարևոր ու առանցքային պետք է լինի նաև հոգևոր կրթությունը: Մենք պետք է «սպառող» քրիստոնյաներից դառնանք «արտադրող» քրիստոնյաներ:
Նշենք, որ Աչաջուր համայնքը գտնվում է նշանավոր հոգևոր դաստիարակության կենտրոն Մակարավանքի հովանու ներքո, որի հովիվը ներկայիս Տեր Արշավիր քահանա Ասատրյանն է:
Միջոցառմանը ներկա էին դպրոցի տնօրենությունն ու ուսուցչական կազմը տնօրեն պարոն Սուրեն Ղալթախչյանի գլխավորությամբ, «Վորլդ Վիժն» միջազգային կազմակերպության ներկայացուցիչներ Տավուշի տարածքային զարգացման ծրագրի պատասխանատու Գայանե Մարտիրոսյանը, երեխաների հովանավորչության ծրագրի պատասխանատու Դիանա Իրբանյանը, երեխաների պաշտպանության ծրագրի պատասխանատու Կարո Կարապետյանը, քրիստոնեական ծրագրերի պատասխանատու պարոն Կարեն Ծովյանը Տավուշի թեմի հոգևոր դասը, գյուղի բնակիչներ և աշակերտությունը:
Սկզբնական շրջանում դպրոցում կդասավանդեն չորս ուսուցիչներ: Դպրոցում գործելու են նաև մանրանկարչության և սրբապատկերների խմբակները:
Դպրոցը հովանավորել են «Վորլդ Վիժն» միջազգային կազմակերպությունն ու Կանադահայ բարերար Անահիտ Մանուկյանը:
Տավուշի թեմի առաջնորդի նախաձեռնությամբ սկսած այս ծրագիրն ունի բազում նպատակներ.
- Կազմակերպված ու համակարգված դարձնել հոգևոր դաստիարակությունը Տավուշում:
- Կիրակնօրյա դպրոցների կրթական դաստիարակության հիմքում դնել հոգևոր կրթության և՛ գիտական, և՛ իմացական, և՛ բարոյական եզրաշերտերը:
- Հոգևոր դաստիարակության միջոցով կրթել ու պատրաստել պատասխանատու և հայրենական ինքնության բարձր գիտակցությամբ ապրող քաղաքացիներ:
Նյութի աղբյուրը` http://yn.am/?index&p=60902&l=am
