Մի ուսանող նայում է պատուհանից և մտածում, թե ինչպես վարվել, քանի որ ջերմություն ունի, վատառողջ է, իսկ դրսում քամի է, ցուրտ, ամպամոտ եղանակ: Բայց իր թերահավատ ընկերը այդ կիրակի համաձայնվել է իր հետ գնալ եկեղեցի` մասնակցելու համար Սբ. Պատարագին: Ինչպես վարվել, ուղեկցել ընկերոջը եկեղեցի և բացատրել նրան Սուրբ Պատարագի խորհուրդը, թե չգնալ…. Իսկ ժամանակն անցնում է և շատ հեռվից արդեն լսվում են եկեղեցու զանգերի հնչյունները:
-Խնդրում եմ, Տեր Աստված, ցույց տուր քո կամքը, ինչպես գործել,- բարձրաձայն աղոթում է երիտասարդը:
-Չե՞ս լսում եկեղեցու զանգերի ձայնը, հիշիր պատվիրանը` սիրիր ընկերոջդ…,-լսվում է մի ձայն, և ուսանողը տեսնում է քիչ հեռու կանգնած սատանային ու զարմացած ասում.
-Իսկ ասում են, թե սատանան միշտ չարն է կամենում:
Այնուհետև շտապ զանգում է ընկերոջը ու դուրս գալիս տնից:
Որոշ ժամանակ անց եկեղեցու մոտ շտապօգնության մեքենա է կանգնում ու ցրտից սարսռած ուսանողին պատգարակով տանում են դեպի մեքենան: Երիտասարդն իր գլխավերևում տեսնում է Հիսուսին ու հարցնում.
-Աստված իմ, բայց չէ որ գրված է` սիրիր ընկերոջդ, և ես նրան ուղեկցեցի դեպի եկեղեցի: Ի՞նչու այսպես ստացվեց
Հիսուս պատասխանում է.
-Սատանան ճշմարտությունը միշտ կիսատ է ասում: Միթե չես հիշում` սիրիր ընկերոջդ, ինչպես սիրում ես քո անձը: Չէ որ կարող էիր կազդուրվել և հաջորդ կիրակի ընկերոջդ դեպի եկեղեցի ուղեկցել: Քեզ չկանչեցի զոհողության, այլ սիրիր ընկերոջդ, ինչպես սիրում ես քո անձը…:
Աստծո կամքը հասկանալու համար նախքան քայլ կատարելը անհրաժեշտ է գնահատել, թե ինչ հետևանքներ ու պտուղներ է բերելու այդ քայլը: Եթե հետևանքներն ու պտուղները բարի են և քեզ համար, և մյուսների համար: Ուստի, դա է Տիրոջ կամքը:
Հեղինակ` Հովհաննես սարկավագ Մանուկյան
