Հիսուսի ասում է. «Երեկ անցյալ էր, ինչ որ արեցիր, դարձավ հուշ, վաղվա վրա հույս չկա, այսօրն է միայն քեզ պատկանում»:
Որպեսզի ավելի պարզ լինի, թե «Ի՞նչ է ժամանակը» և թե «ինչքա՞ն կարևոր է այն» բերեմ ձեզ մի օրինակ: Նախ ասեմ, որ ամերիկացիները ժամանակին ասում են. «Ժամանակը՝ դրամ է – time is money» կամ «Ժամանակը՝ ոսկի է – time is gold»:
Մենք հայերս շատ անգամներ ասում ենք «Ժամանակ չունեմ, շատ զբաղված եմ»: Ինձ համար անհասկանալի է այս խոսքը, որովհետև Աստված մարդուն տվել է այդ ժամանակը, որպեսզի նա իր խելքով ճիշտ գործածի այն: Երբ կարգապահորեն ու ճշտապահորեն օգտագործենք ժամանակը, ամեն ինչ էլ կհասցնենք. ծնողիներին հիշելու, մեր ընկերոջը պատվելու, տկարին օգնելու, կարիքավորին ձեռք մեկնելու, մի խոսքով այն ամենագեղեցիկ երևութները, որոնք մարդուն տալիս են առիթը հոգին գեղեցկացնելու:
Իսկ իմ օրինակը այս է.
Պատկերացրեք, որ գոյություն ունի մի Բանկ, որն ամեն առավոտ մեր հաշվին է փոխանցում օրվա համար անհրաժեշտ մի մեծ գումար: Պայմանը այն է, որ եթե չկարողանանք այդ դրամը գործածել, ապա այն չի մնում մեր հաշվում, կորչում է: Եվ այսպես ամեն օր: Բնական է ով էլ որ լիներ, պիտի աշխատեր ամբողջ գումարը օգտագործել, որպեսզի չկորչեր: Իսկ ո՞րն է մեր հաշվի համարը բանկում: Ի՞նչ է դրա անունը: ԺԱՄԱՆԱԿ:
Ամեն առավոտ Բանկը մեր հաշվին է փոխանցում այդ մեծ գումարը, կարևոր չէ թե ինչքա՞ն: Ամեն գիշեր բանկը զրոյացնում է մեր հաշվեհամարի վրա չգործածված գումարը, որը չենք օգտագործել ինչ որ բարի նպատակի համար: Բանկում պահեստային ֆոնդեր գոյություն չունեն և չի թույլատրվում փոխանցումներ կատարել: Ամեն առավոտ մեզ համար նոր հաշվեհամարներ են բացվում: Գումարը կարողացանք գործածել, լավ, եթե ոչ՝ կորչում է: Ուրիշ ճանապարհ չկա ոչ ետ դարձի և ոչ էլ առաջ գնալու: Վաղվա վրա փոխանցումներ էլ գոյություն չունեն: Պետք է ապրենք ներկայով, այսօրվա գումարով:
Փորձենք մեր ունեցած գումարներով բարի ներդրումներ կատարել, որպեսզի լավագույնը ստանանք: Ժամացույցր շարունակում է իր ընթացքը քսանչորս ժամ, մենք պիտի օգտվենք մեզ ընձեռված հնարավորությունից և բարի գործեր կատարենք, որպեսզի մեր ժամանակը իզուր չանցկացնենք, քանի որ Հիսուս ասում է. «Միայն այսօրն է քեզ պատկանում, մնացածի վրա հույս չկա»: Ուրեմն ապրիր, վայելիր ու վայելեցրու և ժամանակդ իզուր մ ի անցկացրու: Ժամանակը չի սպասում: Հետո, ավաղ, կարող է ուշ լինել և այլևս անդարձ: Մարդու ամենաթանկագին բանը՝ իր կյանքն , իսկ բարիքը՝ ժամանակը:
Օգտագործենք այդ բարիքները մեր նմաններին օգնելու նպատակով:
