«Կարող են կրթական որոշ մասնագետներ այդ կարծիքին լինել, ովքեր աթեիզմն են դավանում կամ ոչ մի կրոնի հետևորդ չեն։ Բայց մի երկրում, որտեղ 80 տոկոսից ավելին հայ եկեղեցու հետևորդ է, նրանք պետք է կրթվեն այդ ժառանգության մեջ»,- ADTV «Հարցազրույց» հաղորդման ժամանակ, անդրադառնալով «Հայ Եկեղեցու պատմություն» առարկան հանրակրթական ծրագրից հանելուն, ասաց Գերաշնորհ Տ. Միքայել Արքեպիսկոպոս Աջապահյանը։
Նրա խոսքով՝ «հայ եկեղեցու պատմությունը» պետք է դասավանդվի դպրոցում, որպեսզի փողոցում չիմանան Հայ Եկեղեցու մասին։
Դիտարկմանը՝ թե սա արդյոք բասացական հետևանք կարող է ունենալ սերունդների մեջ հոգևոր արժեքներն արմատավորելու մասով, Միքայել Արքեպիսկոպոս Աջապահյանը նշեց.« «Հայ եկեղեցու պատմություն»-ն ինտեգրել, տարալուծել ուրիշ առարկաների մեջ գեղեցիկ հնչում է, բայց դա անելը շատ դժվար է և իր նպատակին չի ծառայի։ Սովետական տարիներին էլ հայ եկեղեցու ժառանգությունը ներմուծված էր ճարտարապետության, արվեստի, գրականության մեջ, բայց անգրագետ սերունդ մեծացավ, որոնցից մեկն էլ ես էի, եթե եկեղեցի չգնայի և եկեղեցում հավելյալ կրթություն չստանայի։ Ոչինչ չգիտեին, միայն կարող էին ասել, որ մենք քրիստոնյա ենք և առաջին քրիստոնյան ենք և այստեղ ավարտվում է քրիստոնեական գիտելիքը, այստեղից այն կողմ ոչ մի քրիստոնեական գիտելիք չունեն։ Ուրեմն, եթե մենք ուզում ենք դարձյալ նման սերունդ ունենալ, խնդիր չկա, գնացեք դարձյալ նման սերունդ ունեցեք և եկեղեցին ստիպված այլ միջոցներ պետք է գտնի ժողովրդին իր գիտելիքն ու ժառանգությունը փոխանցելու համար։ Բայց այս էտապն էլ կանցնի, որ ուրիշները կգան ու կասեն ներողություն։ 70-80 տարվա աշխատանք է եղել «Հայ եկեղեցու պատմություն» առարկայի ներմուծումը, 15 տարի ընթացք է ունեցել, ինչ-որ հանգրվանի հասել է։ Այո, թերություններ կան և այդ թերությունները պետք է սրբագրվեն, ոչ թե ընդհանրապես հանվի ու դեն նետվի։ Այնպես որ այդ առարկան կենսական նշանակություն ունի, քանի որ դա հայի ձևավորման համար է»։
Մանրամասները՝տեսանյութում.
Աղբյուր` armdaily.am
