Հայտնում եմ իմ վրդովվմունքն ու խստորեն դաապարտում վերջին ամսվա ընթացքում Վեհափառ Տիրոջ և մեր Սուրբ Եկեղեցու դեմ ընթացող ցույցերը, որոնց նպատակն է թուլացնել, քայքայել ու պառակտել հոգևոր մեր կյանքի միասնականությունը: Ի պատասխան Վեհափառ Տիրոջն ուղղված անփաստարկ բամբասանքների ու զրպարտությունների՝ կամենում եմ հիշեցնել սոսկ մեկ փաստ. Վազգենյան Հոգևոր Դպրանոցը հիմնադրվել է Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի կողմից հեռավոր 1990թ.՝ դեռևս Խորհրդային անաստվածության տարիներին: Այս 28 տարիների ընթացքում Դպրանոցում կրթություն են ստացել հարյուրավոր հայորդիներ՝ հիմնականում սոցիալապես անապահով ընտանիքներից, իսկ Դպրանոցը տվել է մեկ հարյուրյակը գերազանցող շրջանավարտներ՝ այդ թվում եպիսկոպոսներ, վարդապետներ, աբեղաներ, ամուսնացյալ քահանաներ ու սարկավագներ: Թերթե՛ք եկեղեցական պատմության էջերը և տեսե՛ք, արդյոք շա՞տ կաթողիկոսներ ենք ունեցել, ովքեր ճեմարան են հիմնադրել: Վազգենյան Դպրանոցի Հիմնադիր-Հայր` Գարեգին Բ Վեհափառ Հայրապետը նաև հիմնել է Հառիճավանքի Թրբանճյան ընծայարանը (որի շինարարությանն ամենօրյա ականատեսն է եղել Կորյուն աբեղան՝ Հառիճավանքի ծառայության տարիներին և որի համար Վեհափառ Տիրոջը խորին երախտագիտություն է հայտնում հայտնի տեսանյութում): Ի դեպ երախտագիտության մասին: Հատկապես ցավալի է ցուցարարների մեջ նկատել նաև Վազգենյան Դպրանոցում տարբեր տարիներին ուսանած անձանց, որոնց ուզում եմ հիշեցնել Պողոս առաքյալի խոսքերն ուղղված Տիմոթեոսին, որ չար ժամանակներում մարդիկ պիտի լինեն հայհոյող, երախտամոռ ու անշնորհակալ (Բ Տիմ. Գ:1): Հռոմեացի փիլիսոփա Կիկերոնն ասում է. «Շնորհակալ լինելու հատկությունից առավել որևէ այլ առաքինություն չեմ ուզում: Բոլոր առաքինությունները բխում են երախտիքի զգացում ունենալուց»:
Հանուն Վազգենյան Հոգևոր Դպրանոցի՝ արտահայտում ենք որդիական սիրո, հավատարմության և զորակցության զգացումները կրթական այս հաստատության Հիմնադիր-Հորը՝ Ն.Ս.Օ.Տ.Տ. Գարեգին Բ Ամենայն Հայոց Կաթողիկոսին:
Տ. Նշան վարդապետ Հմայակյան
Տեսուչ Սևանի Վազգենյան հոգևոր դպրանոցի
