Դամասկոսի հայոց թեմի Սուրբ Սարգիս եկեղեցու ֆեյսբուքյան էջը տեղեկացնում է. «Դամասկոսի Հայոց Թեմի Առաջնորդութիւնը, Հոգեւորականաց Դասը եւ Դամասկոսի Սուրբ Սարգիս Եկեղեցւոյ թաղականութիւնը կը գուժեն վախճանումը Տ. Աբգար Քհնյ. Քահքէճեանի, որ փոխեցաւ առ Աստուած ի յոյս կենացն յաւիտենից, Շաբաթ, 18 Յուլիս 2020-ին, առաւօտեան ժամերուն:
Տէր Աբգար Քահանան 30 տարի ծառայեց իբրեւ Դամսկսսի Սուրբ Սարգիս Եկեղեցւոյ հոգեւոր հովիւ եւ Հոմսի Սուրբ Մեսրոպ Եկեղեցւոյ այցելու հոգեւոր հովիւ։
Վախճանեալ Տէր Հօր վերջին օծումը պիտի կատարուի, Դամասկոսի Սուրբ Սարգիս Եկեղեցւոյ մէջ, յընթացս Ս. Պատարագի, Երկուշաբթի, 20 Յուլիս 2020-ին, ժամը 11-էն սկսեալ, ապա թաղումը Ազգային գերեզմանատան մէջ, Պապ Շարքի։
Դամասկոսի Հայոց Թեմի Առաջնորդութիւն, հոգեւոականց դասը, Սուրբ Սարգիս Եկեղեցւոյ եւ Տէր Հօր ընտանիքը ցաւակցութիւնները պիտի ընդունին, յուղարկաւորութենէն ետք, Երկուշաբթի, 20 Յուլիս 2020-ին, մինչեւ ժամը 5, նաեւ Երեքշաբթի 21 եւ Չորեքշաբթի 22 Յուլիսին երեկոյեան 5-8-ը, Ազգ. Առաջնորդարանի դահիճէն ներս:
Տէր լուսաւորեսցէ զհոգի վախճանեալ սպասաւորին, տացէ մխիթարութիւն զաւակաց Եկեղեցւոյ իւրում եւ յարուսցէ այլ մշակս ի հունձս իւր։
Յիշատակն արդարոյն օրհնութեամբ եղիցի
Առաջնորդութիւն Հայոց Դամասկոսի Թեմի
ԿԵՆՍԱԳՐՈՒԹԻՒՆ
Տէր Աբգար Քահանայ Քահքէճեանը (աւազանի անունով Գրիգոր), ծնած է 17 Յունիս 1959-ին, Դամասկոսի մէջ, իբրեւ զաւակը Եղիայի եւ Սիրվարդի (Տէր Պետրոսեան):
Նախնական կրթութիւնը ստացած է Դամասկոսի Ազգ. Սբ. Թարգմանչաց Ճեմարանին մէջ, զայն աւարտելով 1984-ին:
Հոգեւոր կրթութիւնը ստացած է Կիլիկիոյ Կաթողիկոսութեան Դպրեվանքին մէջ, երկամեայ քահանայից յատուկ դասարանի ուսումնառութեամբ 1998-2000 թուականներուն:
23 Մայիս 1999-ին, Հոգեգալստեան տօնին, ձեռամբ Գերշ. Տ. Մուշեղ Եպս. Մարտիրոսեանի, Անթիլիասի Սբ. Գրիգոր Լուսաւորիչ Մայր Տաճարին մէջ, ձեռնադրուած է սարկաւագ:
13 Օգոստոս 2000-ին, Աստուածածնի տօնին, ձեռամբ Բարձրշ, Տ. Գնէլ Արք. Ճէրէճեանի, Դամասկոսի Սբ. Սարգիս Առաջնորդանիստ եկեղեցւոյ մէջ, ձեռնադրուած է քահանայ՝ վերանուանուելով Տ. Աբգար Քահանայ:
Տէր Աբգար Քահանայ Քահքէճեանը ծառայած է իբրեւ Դիւանապետ Դամասկոսի Առաջնորդարանի, Հոգեւոր Հովիւ Դամասկոսի Սուրբ Սարգիս Առաջնորդանիստ եկեղեցւոյ եւ այցելու հովիւ Հոմսի Սուրբ Մեսրոպ եկեղեցւոյ:
22 Փետրուար 2006-ին, Սբ. Ղեւոնդեանց Քահանայից տօնին, Գարեգին Բ Ամենայն Հայոց Կաթողիկոսի թիւ 627 կոնդակով ստացած է Լանջախաչ կրելու իրաւունք:
Վախճանեալ Տէր Հայրը ամուսնացած է օրդ. Մարի Պէշպուչաքլեանի հետ, 4 Դեկտեմբեր 1994-ին եւ ունի մէկ զաւակ. Արա Քահքէճեան, (ծն. 1996-ին)»:
