Տեղի ունեցավ Նորատուսի վերականգնված Ս. Աստվածածին եկեղեցու բացման և վերաօծման արարողությունը (նկարներ, տեսանյութ)

 Բացման արարողությանը ներկա էին ՀՀ ԱԺ փոխնախագահ Տիար Ալեն Սիմոնյանը, Գեղարքունիքի մարզպետ Տիար Գնել Սանոսյանը, Նորատուս համայնքի ղեկավար Տիար Մուրադ Հարությունյանը, եկեղեցու բարերարներ Տիար Խաչիկ Կարապետյանը և Տիար Հայկ Մաղաքելյանը, պետական կառավարման եւ տեղական ինքնակառավարման մարմինների ներկայացուցիչներ, արտերկրյա հյուրեր, ուխտավորներ։

 Գերաշնորհ Տ. Արշակ եպիսկոպոս Խաչատրյանը հավարտ արարողության ընթերցեց Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի պատգամը. «Այսօր անհուն բերկրանքով են լցվել մեր սրտերը, քանի որ դեռևս 9-րդ դարում կառուցված և մեզանից մի քանի դար առաջ խոնարհված Նորատուսի Ս. Աստվածածին եկեղեցին իր դռներն է բացել բազմահազար հավատավորների առջև: Եկեղեցին հավատացյալների հավաքականությունն է, իսկ հավատավորներդ վեմերն եք այդ տաճարի: Եկեղեցին հավատավորներին լիացնում է բազմազան շնորհներով ու նրանց համար ճանապարհ հարթում դեպի Աստվածային բարձունքներ: Նորատուսը հայտնի է հնամենի նշանավոր կառույցներով ու հավատի տներով, խաչքարերով, որոնց թիվն ավելանում է այս նորանորոգ եկեղեցու վերաօծմամբ: Աստվածառաք աղոթքով լցրեք այս վերաօծված հավատի տունը: Այսօր տոն է բոլորիս հոգիներում»,- ասված էր հայրապետական պատգամում:

 Այնուհետև եկեղեցու բարերարներ Խաչիկ Կարապետյանին և Հայկ Մաղաքելյանին հանձնվեցին Հայաստանյայց Առաքելական Սուրբ Եկեղեցու «Սուրբ Ներսես Շնորհալի» պատվո բարձր շքանշաններ։

 Նորատուսի Ս. Աստվածածին եկեղեցին կառուցվել է 9-րդ դարում, Սյունյաց Սահակ իշխանի բարերարությամբ: Այն գործել է մինչև 1679 թ. և ավերվել երկրաշարժի հետևանքով:

 Ս. Աստվածածին եկեղեցու վերականգնման աշխատանքները սկսվել են 2010 թվականին՝ տիար Հայկ Մաղաքելյանի բարերարությամբ և շարունակվել են տիար Խաչիկ Կարապետյանի նյութական միջոցներով։ Բարեկարգվել է նաև եկեղեցու տարածքը, ստեղծվել գեղեցիկ պուրակ։