Մայիսի 30-ին, նախագահությամբ Ռուսաստանի և Նոր Նախիջևանի հայոց թեմի առաջնորդ Տեր Եզրաս արք. Ներսիսյանի, Մոսկվայի հայկական եկեղեցու առաջնորդարանում տեղի ունեցավ հոգևորականների և թեմում գործող կրթական հաստատությունների մանկավարժների հերթական ժողովը, որի ավարտին ընդունվեց համատեղ հայտարարություն՝ 2024 թ. մայիսի 28-ին Սարդարապատի հերոսամարտի հուշահամալիրում հոգևորականների հանդեպ պետական պաշտպանության ծառայության և ոստիկանության հատուկ ստորաբաժանումների աշխատակիցների անընդունելի ու խայտառակ պահվածքի առնչությամբ:շ
«Մենք՝ թեմի հոգևորականներս և կրթական հաստատությունների մշակներս, խորապես դառնացած և հոգեպես վրդովված ենք մայիսի 28 -ին Սարդարապատի հերոսամարտի հուշահամալիրում Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի և հոգևորականների մուտքը խոչընդոտող օրինապահ մարմինների ամոթալի գործողությամբ՝ հրահանգված իշխանությունների կողմից, ուստի խստագույնս դատապարտում ենք այն՝ որակելով որպես մեր պատմության մեջ նախադեպը չունեցող սրբապիղծ ու ազգադավ արարք: Մենք՝ ժողովականներս, հիշյալ քստմնելի քայլը դիտարկում ենք հարված մեր ազգային սրբություններին, ինքնությանն ու միասնությանը: Մայր Աթոռ Սուրբ Էջմիածինը և նրա շնորհազարդ ու ազգընտիր գահակալը հայ ժողովրդի հավաքականության ու միասնության խորհրդանիշ են, քրիստոնեական արժեհամակարգի չափորոշիչն ու ազգային հաշվեկշիռը, հոգևոր ու բարոյական ուղենիշը, հետևաբար ամեն հայի սրբազան պարտքն է երկյուղածությամբ ու խոնարհումով վերաբերվել այդ արժեքներին»։
