Փետրվարի 14-ին Հայ Առաքելական Սուրբ Եկեղեցին տոնում է Տեառնընդառաջը կամ Մանուկ Հիսուսի տաճարին ընծայման տոնը։
Տոնի նախատոնակը տեղի է ունենում փետրվարի 13-ի երեկոյան, որի ավարտին կատարվում է Անդաստանի կարգը․ սա արարողություն է, որի ընթացքում օրհնվում են աշխարհի չորս կողմերը։
Եկեղեցու կանթեղների կրակով եկեղեցիների բակերում վառվում են խարույկներ, ինչպես ասում է Սբ. Եփրեմ Ասորին․ «Հեթանոսները Աստծու պատիվը կրակին էին մատուցում, իսկ մենք ցույց ենք տալիս կրակը որպես Քրիստոսի ծառա, որի միջոցով այն բերում ենք Աստծուն ծառայեցնելու։ Նաև՝ վրայից թռչելով, այն ոտնատակ ենք տալիս՝ ասելով․ դու աստված չես, այլ Նա է Աստվածը, Ով քառասուն օրական հասակում եկավ տաճար»։
Ամենայն Հայոց Գարեգին Բ Կաթողիկոսի տնօրինությամբ այս տոնը հռչակվել է նորապսակների օրհնության օր։ Փետրվարի 14-ին, Սուրբ Պատարագից հետո, Հայ եկեղեցիներում կատարվում է նորապսակների օրհնության կարգը։
