Եկեղեցու ներսում մշտապես եղել են պառակտիչ ուժեր, որոնց նպատակն է եղել խարխլել դարավոր ավանդության հիմքերը և եկեղեցու մասին կարծիք հայտնել սեփական նեղ շահադիտական տեսանկյուններից ելնելով: Պատմությունը կրկնվում է. դա նրա թերություններից է: Վերջին օրերին հայ հասարակությանը հուզում է Հայ Առաքելական Ս. Եկեղեցու և ԱԶԳԸՆՏԻՐ Հայրապետի դեմ հնչող ոչ իրավացի, ոչ պատշաճ և ԱՆՀԻՄՆ մեղադրանքները:
Հասարակության ցանկացած անհատ, ով իրեն Հայ Առաքելական Ս. Եկեղեցու անդամ է համարում, նրա դարավոր, նվիրագործված և սրբագործված ավանդության կրողն ու փոխանցողն է: Կեղծ հավատքի և կեղծ եկեղեցասիրության «քարոզներով և կոչերով» մոլորեցնել որոշ հավատացյալների և հրապարակավ Հայոց Հովվապետի, Մայր Աթոռի միաբանության և ողջ հոգևորականության դեմ մեղադրանքներ հնչեցնել, նշանակում է հարվածել եկեղեցու միասնությանը: Հայրապետի դեմ հնչող ամեն խոսք ոչ միայն Հայրապետի, այլ նաև եկեղեցու յուրաքանչյուր անդամի՝ այդ թվում թե՛ եկեղեցականի և թե աշխարհականի դեմ է:
Քրիստոնեությունը ինքնաճանաչողության և ինքնաքննության կրոն է. սեփական մեղքերը տեսնելն ու դրանց դեմ պայքարելը թեպետ մարդուց մեծ ջանքեր է պահանջում, սակայն այս ճանապարհով է միայն հնարավոր հասնել փրկության: Սրա հակառակ բևեռը դիմացինին դատելն է, որը թույլ չի տալիս նկատել սեփական թերություններն ու սխալները: Այսօր Եկեղեցու բարեկարգում պահանջողները, որդեգրելով աղանդավորական կեցվածք և իրենց մյուսներից ավելի հավատացյալ կարծելով, դեմ են դուրս եկել Ավետարանական հավատքի սկզբունքներին. «Ինչո՞ւ քո եղբոր աչքի մեջ շյուղը տեսնում ես, իսկ քո աչքի մեջ գերանը չես տեսնում» (Մատթ. 7:3): Քրիստոս է մեր դատավորը և միայն նա գիտի մարդկանց սրտերը և նրանց աղոթքի անկեղծությունը: Որևէ մեկը իրավունք չունի Աստծո դիրքերից խոսելու և որոշելու այս կամ այն մարդու հավատքի չափը կամ «ԱՂՈԹԱՍԵՐ» լինելը: Ի լուր բոլորիս, նա, ով եկեղեցիներ է կառուցում, բնականաբար և վստահաբար մտահոգ է աղոթքի հարատևության և սեփական հոտի փրկության համար:
Հորդորում եմ մեր Սուրբ Եկեղեցու հավատավոր զավակներին չընկնել կեղծ «բարեպաշտ քարոզիչների» կողմից արված սին և մտացածին հայտարարությունների և կոչերի ազդեցության տակ և մշտապես հիշել, որ «եկեղեցին երեկ և այսօր՝ նույն և հավիտյան»:
Հետևաբար այսօր ամենքիս պարտավորությունն է միասնաբար անխախտ պահել մեր Սուրբ Եկեղեցու հավատքն ու միասնությունը:
