«Ոչ մի ժողովուրդ, իր անկախության ու սրբազան հավատի համար չի պայքարել այնքան համառորեն ու հարատևորեն, որքան Հայը: Հայի պայքարն ուրիշ բան չէ, քան քմահաճ ճակատագրին հավատով հաղթելու ներքին անհրաժեշտություն»,- «Իրավունքի» հետ զրույցում անդրադառնալով 23 շարունակ արցախա-ադրբեջանական սահմանին հակառակորդի կողմից սանձազերծած լայնամաշտաբ ռազմկան գործողություններին, ասաց Հայ Առաքելական եկեղեցու Արագածոտնի թեմի առաջնորդ ՄԿՐՏԻՉ ԵՊԻՍԿՈՊՈՍ ՊՌՈՇՅԱՆԸ, ընդգծելով.
-Այս օրերին մեր ժողովրդի քաջարի զավակները կենաց ու մահու պատերազմ են մղում անհայրենիք ոսոխի դեմ` պաշտպանելու համար Հայրենի մեր Երկիրը և մեր սրբությունները:
Անբեկանելի ճշմարտություն է, որ արցախյան հայրենական պատերազմն իրավունքի, հավատի և խղճի ազատության հերոսամարտ է, որտեղ վերջնարդյունքն է հաղթանակ և պարգևը` ազատ հայրենիք, քանզի մեռնելը հերոսություն է այնտեղ, որտեղ հետագա կյանքը կորցնում է այլևս իր նշանակությունը:
Նահատակության պսակին ձգտող անձնուրաց հայորդիք այսօր հաղթականորեն անցնում են մահվան ստվերների միջով, որպեսզի թշնամու ոտքերի կոխան չդառնա ամենքիս Հայրենիքն ու հավատքի սրբազան խաչվառը, ուրեմն ՀԱՂԹԵԼՈՒ ԵՆՔ: Փա′ռք Բարձրյալին, Փա′ռք Հայոց Բանակին:
ԻԼՈՆԱ ԱԶԱՐՅԱՆ
Աղբյուր` iravunk.com
