Հոկտեմբերի 30-ին՝ ժամը 9:30-ին, Մայր Աթոռ Սուրբ Էջմիածնի «Վաչե և Թամար Մանուկյան» Մատենադարանում, օրհնությամբ Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի, Մայր Աթոռ Սուրբ Էջմիածնի թանգարանների ջանքերով` համագործակցությամբ «Կոնրադ Ադենաուեր» հիմնադրամի և ԵՀԽ-ի Հայաստանյան միջեկեղեցական բարեգործական Կլոր սեղան հիմնադրամի, կսկսի «Միջմշակութային և միջկրոնական երկխոսություն. կրոնական թանգարանների առաքելությունը» խորագրով միջազգային կոնֆերանսը:
Կոնֆերանսը կազմակերպվում է ի նպաստ ամբողջ աշխարհում և հատկապես Մերձավոր Արևելքում, կովկասյան ու անդրկովկասյան տարածաշրջանում խաղաղության հաստատման: Խնդրո կոնֆերանսի կազմակերպումը նպատակ է հետապնդում, առաջին անգամը լինելով, ի մի ժողովել կրոնական մշակույթները ներկայացնող թանգարանների, որպեսզի որոշ թեմաների շրջանակներում ծավալվելիք զեկուցումների ու քննարկումների արդյունքում վեր հանվեն հիշյալ թանգարանների տեղն ու դերը հասարակությունների կյանքում, ինչպես նաև խնդրո թանգարանները միմյանց ի մոտո ճանաչելով`ձեռնամուխ լինեն սերտ համագործակցության` համերաշխության ու հանդուրժողականության գաղափարների հաստատման գործին բարի ու կարևոր ծառայություն մատուցելով, նպաստելով միջկրոնական, միջմշակութային երկխոսության ճանապարհով ցանկալի և բարերար համերաշխության ու խաղաղության հաստատմանը հասարակությունների մեջ:
Կոնֆերանսի թեմաներն են՝
ա. Մասնակից թանգարանների ներկայացում,
բ. Էթնոսի կյանքում կրոնի տեղն ու առաքելությունն անցյալում և այսօր,
գ. Կրոնական մշակույթի ստեղծման ու զարգացման պատմությունը,
դ. Կրոնական թանգարանը` որպես կրոնական հուզումների և զգացմունքների առաջացման ու զարգացման օջախ,
ե. Կրոնական մշակույթների նպաստը միջազգային համերաշխության և հանդուրժողականության գաղափարների հաստատման գործում:
Կոնֆերանսին մասնակցում են թանգարանագետներ, արվեստագետներ Հայաստանից, Ռուսաստանից, Իտալիայից, Իրանից և Ֆինլանդիայից:
Աղբյուր՝ https://web.facebook.com/events
