Հոկտեմբերի 6-8-ը` Սրբոց Թարգմանչաց տոնին ընդառաջ, Մայր Աթոռ Ս. Էջմիածնի Գևորգյան հոգևոր ճեմարանի և «Վաչե և Թամար Մանուկյան» Մատենադարանի նախաձեռնությամբ Մայր Աթոռում կանցկացվի «Սուրբ Գրքի հայերեն թարգմանությունն ու հրատարակությունը պատմության հոլովույթում» խորագիրը կրող միջազգային գիտաժողով` նվիրված Աստվածաշնչի հայերեն տպագրության 350-ամյակին:
Գիտաժողովի ընթացքում մասնակիցները` հայ և օտարազգի պատմաբաններ, ծիսագետներ, աստվածաբաններ, կներկայանան Աստվածաշնչի բնագրային, պատմական և աստվածաբանական վերլուծություններով:
Գիտաժողովի բացումը, նախագահությամբ Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի, տեղի կունենա հոկտեմբերի 6-ին` ժամը 10:00-ին, Գևորգյան հոգևոր ճեմարանի դահլիճում:
Բացմանը կընթերցվի նաև Ամենայն Հայոց Կաթողիկոսի սրբատառ կոնդակը Աստվածաշնչի հայերեն տպագրության 350-ամյակի առիթով:
Գիտաժողովի փակումը տեղի կունենա Սրբոց Թարգմանչաց տոնին Օշականի «Ս. Մեսրոպ Մաշտոց դպրատուն» գիտամշակութային կենտրոնում:
