«Առաջինը իրենք պիտի սկսեն իրենց ընտանիքներից, «գենդեր» կարող է որպես օրենք թղթի վրա գրվել, բայց կյանքի չկոչվել: Դժբախտաբար, մեր ընտանիքներում թույլ ենք տալիս ամեն տեսակ այլասերություն: Այն, որ էմո շարժումը կա, այն, որ ամեն տեսակի այլասերված աղանդներ մտնում են մեր մեջ եւ այլասերում են մեր ազգային դեմքը, մենք ենք մեղավոր»,- այսօր ընդդեմ «գենդերային» օրենքի եւ «գենդերային» պարտավորությունների փաթեթի երթի ժամանակ նշեց Մայր Աթոռ Սուրբ Էջմիածնի միաբան, հայորդաց տների հոգեւոր տեսուչ-տնօրեն ԿՈՄԻՏԱՍ վարդապետ ՀՈՎՆԱՆՅԱՆԸ: Նշենք, որ երթի մասնակիցները մասնավորապես պահանջում էին չեղյալ հայտարարել «Կանանց եւ տղամարդկանց հավասար իրավունքների ու հավասար հնարավորությունների ապահովման մասին» ՀՀ թ. 57 Օրենքը, որտեղ սողոսկել է «գենդեր», «գենդերային» եզրույթները: Երթը մեկնարկեց Թամանյան արձանի հարակից տարածքից ու թեպետ աշխատանքային ժամին մեծ թվով մարդիկ էին համախմբվել նույն գաղափարի շուրջ, այդ թվում նաեւ երթին էին միացել ինչպես Հայր Կոմիտաս վարդապետ Հովնանյանն, այնպես էլ Կոտայքի թեմից Տեր Կյուրեղ քահանա Տալյանը, բուհերի ուսանողների եւ երիտասարդության հոգեւորպատասխանատու Գեղամ սարկավագ Ավետիսյանը, հասարակական-քաղաքական գործիչ Խաչիկ Ստամբոլցյանը, «Միացյալ երիտասարդական լիգա» շարժման անդամները եւ այլք: Երթն ավարտվեց ՀՀ կառավարության շենքի դիմաց, որտեղ կառավարության ներկայացուցչին հանձնվեց պահանջագիր-նամակը` 3500 ստորագրություններով: Կառավարության շենքի դիմաց Հայր Կոմիտաս վարդապետ Հովնանյանը շեշտեց. «Մեր ձայնն այսօր ոչ թե ուղղված է այս շենքի կառույցից ներս գտնվողներին, այլ ամեն մեկիս խղճին, որպեսզի ոչ մեկ թույլ չտա իր եղբորը, իր քրոջը, իր զավակին ու իր հարազատին այլասերության ճանապարհը բռնել այնպես, ինչպես մեզ քարոզում են, այսպես կոչված «մարդասիրական կառույցները» կամ ազատամտություն բարբաջողները: Մենք այստեղ եկել ենք մեկ բանի համար. պահելու մեր ազգային դեմքը, պահելու մեր ազգային ոգին, որպեսզի առհավետ գոյություն ունենա հայոց սրբազան աշխարհը եւ ոչ թե այս տարածությունը վաղը դառնա Թուրքիա, Պարսկաստան, կամ էլ Ադրբեջան: Մենք պարտավոր ենք մեր սրբությունների տերը լինել»:
Հանուն հայ ընտանիքին ու բարոյական արժեքներին նվիրված երթն ավարտվեց աղոթքով եւ ինչպես Հայր սուրբն ասաց. «Աղոթք նշանակում է ավանդության պահպանում, բարոյականի կարեւորում: Աղոթք նշանակում է մեր կապը առ Աստված: Ես կարծում եմ, որ ոչ ճիշտ աղոթքի պատճառով է, որ մենք այսօր հայտնվել ենք այսպիսի ողբերգության առաջ, որովհետեւ միշտ չէ, որ Տեր ասելիս մենք ճշմարտության Տիրոջն ենք խոսք ուղղում»:
Նյութը եւ լուսանկարները` ՀՐԱՆՏ ՍԱՐԱՖՅԱՆԻ, աղաբյուր՝ iravunk.com
