Խոր ցավով տեղեկացնում ենք, որ հունվարի 24-ին՝ կյանքի 61-րդ տարում, ի Տեր ննջեց Հայաստանյայց առաքելական Սուրբ Եկեղեցու նվիրյալ սպասավոր, Քանաքեռի Ս. Հակոբ եկեղեցու հոգևոր հովիվ արժանապատիվ Տ. Սերովբե ավագ քահանա Պետրոսյանը:
Արժանապատիվ Տեր հայրը երկար տարիներ հոգևոր ծառայություն է մատուցել քաղաքամայր Երևանի եկեղեցիներում, և նրա կորուստը մեծ է Արարատյան Հայրապետական թեմի թե հավատացյալների, թե քահանայից դասի համար:
Արարատյան Հայրապետական թեմի հոգևոր դասի ու հավատացյալների անունից ցավակցություն ենք հայտնում Տեր հոր ընտանիքին՝ հայցելով Ս. Հոգու մխիթարությունը:
Յիշատակն արդարոյն օրհնութեամբ եղիցի:
Վաղը՝ հունվարի 25-ին՝ ժամը 18.00-ին, Քանաքեռի Ս. Հակոբ եկեղեցում տեղի կունենա հոգեհանգստյան կարգը: Հաջորդ օրը՝ հունվարի 26-ին՝ ժամը 10.30-ին, կմատուցվի Ս. Պատարագ, որի ընթացքում կլինի Վերջին Օծման կարգը, այնուհետև՝ հուղարկավորությունը:
Կենսագրություն.
Տեր Սերովբե (ավազանի անունը՝ Կառլեն) ավագ քահանա Պետրոսյանը ծնվել էր 1956թ. սեպտեմբերի 13-ին, Թբիլիսիում: 1958թ. ի վեր բնակվում էր Երևանում: 1974թ. ավարտել էր Երևանի Հովհ. Պողոսյանի անվան թիվ 82 միջնակարգ դպրոցը: 1974-1976թթ. ծառայել էր խորհրդային բանակում (Սվերդլովսկ քաղաքում): 1979թ. սեպտեմբերին ընդունվել էր Մայր Աթոռ Սուրբ Էջմիածնի քահանայից պատրաստման լսարան: 1981թ. ուսումը շարունակել էր ճեմարանում և 1983թ. ավարտել՝ պաշտպանելով ավարտաճառ: 1984թ. օգոստոսին ձեռամբ Տեր Հուսիկ արքեպիսկոպոս Սանթուրյանի ձեռնադրվել էր ամուսնացյալ քահանա: 1984-1985թթ. ծառայել էր Երևանի Ս. Գևորգ, 1985-1986թթ.՝ Հրազդանի շրջանի Աթարբեկյան գյուղի Ս. Աստվածածին, 1986-2005թթ.՝ Երևանի Զորավոր Սուրբ Աստվածածին եկեղեցիներում: 1988թ. հոկտեմբերի 7-ին Վազգեն Ա Ամենայն Հայոց կաթողիկոսի օրհնությամբ ստացել էր լանջախաչ, 1998թ. հունվարի 9-ին արժանացել էր ծաղկյա փիլոն կրելու իրավունքի: 2005թ. փետրվարի 1-ին Գարեգին Բ Ամենայն Հայոց կաթողիկոսի օրհնությամբ ստացել էր ավագության պատիվ: 2005-2015թթ. ծառայել էր Երևանի Ս. Հովհաննես Մկրտիչ եկեղեցում: 2015թ. ի վեր ծառայում էր Քանաքեռի Ս. Հակոբ եկեղեցում: Ամուսնացած էր, ուներ 3 զավակ:
Աղբյուր՝ facebook.com/Qahana.am
