«Եթե չհավատաք, չեք հասկանա» (Ես․ 7։9)։
Համացանցում «Նոր Հայաստան, Նոր Հայրապետ» վերտառությունը կրող նախաձեռնության էջում հրապարակվեց Կատալոնիայի մի քանի միությունների կողմից Գարեգին Բ Ամենայն Հայոց Կաթողիկոսի հրաժարականի պահանջի վերաբերյալ հայտարարությունը։ Առ ի տեղեկություն նշեմ, որ 2017թ․ սեպտեմբեր ամսից, բարսելոնահայության խնդրանքին ընդառաջ, Ամենայն Հայոց Հայրապետի կողմից նշանակվել եմ Իսպանիայում և Պորտուգալիայում Արևմտյան Եվրոպայի Հայրապետական պատվիրակի փոխանորդ։ Առիթ ունենալով բազմիցս շփվելու այդ միությունների անդամների հետ, նախևառաջ ափսոսանքի և ցավի զգացում ապրեցի, քանի որ այս անձերը և կամ նրանց մեծամասնությունը այդքան էլ լավ չեն պատկերացնում, թե ի՞նչ է Հայ Եկեղեցին, որն է Եկեղեցու առաքելությունը, ինչպես են ընտրվում հայրապետները, և ինչպես են «գահընկեց» արվում նրանք։ Վերջին օրերին զրուցելով նրանցից որոշների հետ լսեցի բացառապես բամբասանքի նմանվող մի շարք անհիմն մեղադրանքներ և հերյուրանքներ, ինչպես նաև վերջնագրային ոճ պարունակող պահանջներ, որոնք միանշանակորեն Եկեղեցու ավանդական ընթացակարգից դուրս են, և հետևապես որևէ առնչություն չեն կարող ունենալ իրականության հետ։ Նշեմ, որ Կատալոնիայում հաշվվում են շուրջ 7000 հայորդիներ, բացի նշյալ միություններից Բարսելոնայում գործում է Հայ Առաքելական Սուրբ Եկեղեցու ծխական խորհուրդը՝ բաղկացած 9-ը անդամներից, վերջիններս էլ ձեռնամուխ են եղել համայնքային կյանքի ձևավորման ու զարգացման գործին։ Ծխական խորհրդի, անձնապես իմ, ինչպես նաև բազմաթիվ հավատացյալների համար վերոհիշյալ հրապարակումն անընդունելի է համարվում, քանի որ նման դիրքորոշումը համայնքի ներսում կարող է երկպառակտության և անhամաձայնության դրսևորումներ ունենալ՝ խաթարելով համայնքի բնականոն կյանքը։ Մայր Աթոռ Սուրբ Էջմիածինը Եպիսկոպոսաց և Միաբանական ժողովների անունից արդեն հայտարարվել է, որ հայաստանյան ներքաղաքական վերջին շրջանի զարգացումների տրամաբանությունը ներեկեղեցական կյանքում օգտագործելու փորձն անընդունելի և անթույլատրելի է հոգևոր ու բարոյական տեսանկյուններից։ Դարեր շարունակ մեր Եկեղեցու առաքելությունը եղել և մնում է Քրիստոսի փրկարար Ավետարանի քարոզչությունը, հոգեփրկչական ծառայությունը, որը հայ հոգևորականությունը, ի գլուխ ունենալով Գարեգին Բ Հայրապետին իրականացնում է մեր ժողովրդի կյանքում։ Մենք կոչված ենք երաշխավորը լինելու նաև հայ ժողովրդի միասնության, ազգային և հոգևոր նպատակների իրագործման ու պահպանման, այլ ոչ թէ պառակտման:
Տ․ Սիփան վարդապետ Գևորգյան
Իսպանիայում և Պորտուգալիայում Արևմտյան Եվրոպայի Հայրապետական Պատվիրակի Փոխանորդ
