Մայիսի 30-ին Մայր Աթոռ Սուրբ Էջմիածնի հովանու ներքո գործող Կալկաթայի Հայոց Մարդասիրական ճեմարանի չորս շրջանավարտներ վերադարձել են Հայաստան, որպեսզի ծառայության անցնեն ՀՀ զինված ուժերում:
Շրջանավարտները Կալկաթայի Հայոց մարդասիրական ճեմարանի տեսուչ Հոգեշնորհ Տ. Մովսես աբղ. Սարգսյանի ուղեկցությամբ այցելեցին ՀՀ Պաշտպանության նախարարություն և հանդիպեցին ՀՀ ԶՈՒ հոգևոր առաջնորդ Գերաշնորհ Տ. Վրթանես եպս. Աբրահամյանի հետ։
Սրբազան Հայրն ուրախությամբ ընդունելով շրջանավարտներին՝ իր գնահատանքն ու օրհնությունը փոխանցեց նրանց, ինչպես նաև հորդորեց պատրաստակամորեն հանձն առնել հայրենիքի հանդեպ իրենց զինվորական սրբազան պարտքը։ Եվ քանի որ սաները Հնդկաստանի հայ եկեղեցիներում երկար տարիներ մասնակցել են եկեղեցական սրբազան արարողություններին, մասնավորապես սուրբ Պատարագի արարողությանը և սպասավորել սուրբ Խորանին, ուստի Սրբազան Հայրն իր օրհնությունը տվեց, որ վերջիններս իրենց ծառայության ընթացքում համագործակցեն գնդերեցների հետ, ինչպես նաև ընդգրկվեն զորամասերի հոգևոր ակտիվներում։
Սրբազան Հայրը նաև Նոր Կտակարաններ ու հոգևոր, հայրենասիրական գրքեր բաժանեց ապագա հայ զինվորներին։
