Հունվարի 31-ին Հայ Առաքելական Սուրբ Եկեղեցին նշում է հայ ժողովրդի համար սիրելի և պաշտելի սրբերից մեկի՝ Սուրբ Սարգիս զորավարի, նրա որդի Մարտիրոսի և 14 քաջ մարտիկների հիշատակության օրը։ Սուրբ Սարգիս զորավարը համաքրիստոնեական սուրբ է։ Ըստ ժողովրդական պատկերացումների՝ նա գորշ կամ ճերմակ ձիավոր էր, ով ձիով շրջում էր լեռներում և օգնում խեղճերին, կարիքավորներին ու ճանապարհորդներին։ Սուրբ Սարգիսը նաև երիտասարդ սիրահարների օգնականն ու պահապանն է, ճանապարհին վտանգվածների ապավենը և արագահաս օգնականը բոլոր նեղյալների, որի համար նրանք, ովքեր անակնկալ ու հանկարծահաս որևէ փորձության են ենթարկվում, իսկույն հիշում են Սուրբ Սարգսին։ Ավանդազրույցի համաձայն՝ նա իր որդու՝ Մարտիրոսի և 14 քաջ մարտիկների հետ նահատակվել է հանուն քրիստոնեական հավատքի։ Տարիներ առաջ Ամենայն Հայոց Գարեգին Բ Կաթողիկոսի օրհնությամբ Սուրբ Սարգիս զորավարի տոնը հռչակվել է Երիտասարդների օրհնության օր։
