Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի օրհնությամբ Մայր Աթոռ Սուրբ Էջմիածնի Հրատարակչական բաժինը լույս է ընծայել երկու նոր հրատարակություններ` Երվանդ Օտյանի «Անիծյալ տարիներ. 1914-1919 (անձնական հիշատակներ)» մենագրության ռուսերեն թարգմանությունը և Արշակ Տեր-Միքելյանի «Ուսումն Ս. Գրոց (ներածություն)» դասագիրքը:
Երվանդ Օտյանի մենագրությունը, որտեղ ներկայացվում են հայ ժողովրդի պատմության ամենից մռայլ էջերը` Օսմանյան կայսրության կողմից իրականացված Հայոց Ցեղասպանությունը և հայկական Գողգոթան, ռուսերենի է թարգմանել Հրազդան Մադոյանը:
Հոգևոր-կրթական հաստատությունների ուսանողների և Ս. Գրքով հետաքրքրվողների համար նախատեսված «Ուսումն Ս. Գրոց» դասագիրքը, որի առաջին հրատարակությունը Արշակ Տեր-Միքելյանը ձոնել էր Գևորգյան հոգևոր ճեմարանի հիմնադրման 25-ամյակին (Թիֆլիս, 1901 թ.), վերահրատարակվել է գրեթե առանց փոփոխության` լրացվելով միայն 20-րդ դարասկզբին բնորոշ եզրերի վերաբերյալ ծանոթագրություններով:
Գրքերը հրատարակվել են մեկենասությամբ «Սարգիս Գաբրիելյան» հիմնադրամի:
