Դիլիջանում այսօր բնակիչների հետ հանդիպման ժամանակ վարչապետի պաշտոնակատար, «Քաղաքացիական պայմանագիր» կուսակցության վարչապետի թեկնածու Նիկոլ Փաշինյանը հայտարարել է, որ կեղծ էլիտաներին թույլ չեն տալու վերարտադրվել։
«Եթե պետք լինի՝ կանենք հեղափոխություն, էլի հեղափոխություն, էնքան՝ մինչև էլիտաները, հոգևորից սկսած՝ քաղաքականով վերջացրած, խոնարհվեն սեփական ժողովրդի առաջ: Դուք տեր չեք, ծառա եք, դուք այլևս ՀՀ-ում չեք լինելու տեր: Դուք բոլորդ պիտի խոնարհ ծառայեք ժողովրդին: Ժողովո՛ւրդ, նրանք տանել չեն կարողանում, որ դուք դուրս եք եկել ձեր տներից, նրանք ուզում են, որ դուք ապրեք, շնչեք, արտաշնչեք իրենց թուլտվությամբ: Ո՛չ, չի լինելու տենց բան», – հայտարարել է Փաշինյանը։
Վերոնշյալի շուրջ փորձեցինք մեկնաբանություն ստանալ Տավուշի թեմի առաջնորդ Տեր Բագրատ եպիսկոպոս Գալստանյանից, ով նկատեց.
-Հոգեւորականությունը ժողովրդին տեր է եղել եւ տեր էլ մնալու է մշտապես: Ես չգիտեմ իր և իրենց գլխի մեջ տերն ու ծառան ինչպես է բաժանված, բայց մեր կյանքում տեր լինելը հենց ծառայությունն է եւ մենք ոչ մի նման խնդիր չունենք: Ինչպես ես այնպես էլ ողջ հոգևորականությունը տեր եմ եղել իմ ժողովրդին` տեր էլ մնալու եմ մինչեւ վերջ:
-Սրբազան, առհասարակ նման արտահայտությունը ինչի՞ մասին է խոսում:
-Դա իրեն պետք է հարցնեք, իր երեւակայությանը, իր պատկերացումներին: Անկեղծ, շատ անշնորհակալ գործ է մեկնաբանելը նման հայհոյախառն, ոչ հավասարակշիռ արտահայտությունները ինչպես այս այնպես էլ ամբողջ ընթացքի առումով։
ԻԼՈՆԱ ԱԶԱՐՅԱՆ
Աղբյուր՝ iravunk.com
