Ի պատասխան «Նոյյան Տապան»-ի հարցմանը, որքանով է իրականությանը համապատասխանում մամուլում տեղ գտած այն տեղեկությունը, թե Արցախյան ազատամարտի մասնակից, տարածաշրջանային հարցերով փորձագետ-վերլուծաբան, Սարգիս Հացպանյանի մահից հետո (հունվարի 20-ին, Ֆրանսիայի Լիոն քաղաքում) եկեղեցին «ոչ մի տիպի շահագրգռվածություն չի ցուցաբերում», եւ «Ընտանիքի բարեկամների ոչ մի խնդրանքին եկեղեցուց դրական արձագանք չեն տալիս», որպեսզի «հոգեհանգստի կարգ մատուցելու համար նախատեսված» գումար չմուծվի (շուրջ 200.000 դրամ), Ս․Հացպանյանի կինը` Հասմիկ Պողոսյանը, հայտարարեց, որ այդ լուրը իրականությանը բացարձակապես չի համապատասխանում։ Ըստ Հ․Պողոսյանի, Սարգսի մահից հետո Հայ առաքելական եկեղեցու ներկայացուցիչները կապվել են իր հետ եւ պատրաստակամություն հայտնել կատարել Սարգիս Հացպանյանի հուղարկավորության հետ կապված բոլոր եկեղեցական կարգերը։ Նրանք նաեւ ցանկություն են հայտնել այդ ամենը կատարել անվարձահատույց, ինչն իր կողմից ընդունվել է երախտագիտությամբ։
«Բոլոր այն լուրերը, որ եկեղեցին «ցավալի պահվածք» ունի եւ «ոչ մի տիպի շահագրգռվածություն չի ցուցաբերում», որ «ընտանիքի բարեկամների ոչ մի խնդրանքին եկեղեցուց դրական արձագանք չեն տալիս, որպեսզի գոնե այդ գումարը չմուծվի», չի համապատասխանում իրականությանը», — ասաց Ս․Հացպանյանի կինը, ավելացնելով, որ «Այս պարագայում շրջանառվող ապատեղեկատվությունները առավել քան վրդովվեցուցիչ են»։
Աղբյուր՝ http://m.nt.am
