Ինչպես տեղեկացնում է Armchurchnews լրատվական պորտալը Կենտրոնական Եվրոպայի և Սկանդինավյան երկրների Հայրապետական Պատվիրակ Գերաշնորհ Տ. Տիրան եպիսկոպոս Պետրոսյանը օգոստոսի 18-20-ը հովվական այցով գտնվել է Ֆինլանդիայի Հանրապետությունում։
Օգոստոսի 19-ին Ֆինլանդիայի Էսպո քաղաքում ձեռամբ Տիրան Սրբազանի տեղի է ունեցել հայկական Խաչքարի օրհնության և օծման արարողություն։
Խաչքարի բացման արարողությանը ներկա էին Սկանդինավյան երկրներում ՀՀ փոխդեսպան Հայարփի Դրմեյանը, Կովկասյան երկրներում Ֆինլանդիայի դեսպան Քրիստի Նարինեն, Հելսինկիի և համայն Ֆինլանդիայի արքեպիսկոպոս Լեո Մակոնեն, Լյութերական եկեղեցու հոգևոր հովիվ Տիմո Ռիքվիստը, հայ համայնքի անդամներ։
Խաչքարը կանգնեցվել է Էսպո քաղաքի Սուրբ Հերման Ալիասկացի եկեղեցու բակում։ Այն առաջին Խաչքարն է, որ կանգնեցվում է Ֆինլանդիայում, և նվիրված է հայ֊ֆինական բարեկամությանը։
Օգոստոսի 20-ին, Հելսինկիի Սուրբ Հակոբ և Սուրբ Կատարինե ուղղափառ եկեղեցում հանդիսապետությամբ Կենտրոնական Եվրոպայի և Սկանդինավիայի Հայրապետական պատվիրակ Տ․ Տիրան եպս. Պետրոսյանի Սուրբ և Անմահ Պատարագ է մատուցել Տ. Ստեփանոս քահանա Հովհաննիսյանը։ Ս. Պատարագին ներկա էր նաև Հելսինկիի և համայն Ֆինլանդիայի արքեպիսկոպոս Լեո Մակոնեն, եկեղեցու հոգևոր հովիվ Իսա Պաառը։
