Անշուշտ Հայ Առաքելական Եկեղեցին պետք է առանձնանա մյուս կրոնական կազմակերպություններից, և նրան տրվի առավելություն. Tert.am-ի հետ զրույցում ասաց Շիրակի թեմի առաջնորդ տեր Միքայել եպիսկոպոս Աջապահյանը՝ անդրադառնալով շրջանառության մեջ դրված «Խղճի ազատության և կրոնական կազմակերպությունների մասին Հայաստանի Հանրապետության օրենքում փոփոխություն կատարելու մասին» օրենքի նախագծին:
Հիշեցնենք, որ նախագիծը դրվել էր քննարկման, և հիմնական թիրախ է համարվել այն, թե չպետք է Հայ Առաքելական Եկեղեցուն առավելություն տալ մյուս կրոնական կազմակեպությունների նկատմամբ, և օրենքը հավասարապես պետք է վերաբերի բոլոր կրոնական կազմակերպություններին:
Նշենք, որ նախագծի առաջին կետում նշվում է, որ սույն օրենքով կարգավորվում են ՀՀ յուրաքանչյուր անձի՝ մտքի, խղճի և կրոնի ազատության արտահայտման, ինչպես նաև կրոնական կազմակերպությունների ստեղծման և գործունեության հետ կապված հարաբերությունները:
Իսկ երկրորդ կետով նշվում է, թե ՀՀ և Հայաստանյաց Առաքելական Սուրբ եկեղեցու հարաբերությունները կարգավորվում են «ՀՀ և Հայաստանյայց Առաքելական Սուրբ եկեղեցու հարաբերությունների մասին» ՀՀ օրենքով:
Ըստ ընդդիմախոսների՝ ստացվում է, որ մի կողմից գրված է, թե օրենքը վերաբերում է բոլոր կրոնական կազմակերպություններին, մյուս կողմից, որ այս ամենը վերաբերում է ոչ Հայ Առաքելական Եկեղեցուն:
Միքայել եպիսկոպոս Աջապահյանը նշեց, թե բոլոր կրոնական կազմակերպություններն էլ հավասար են, բայց պատմության բերումով Հայ Առաքելական Եկեղեցուն ոչ մեկ էլ հավասար չէ:
«Ազդեցությամբ, հեղինակությամբ, վաստակով էդ ո՞րն է հավասար Հայ եկեղեցուն։ Իրենք պետք է ուրախ լինեն, որ ունեն հայ եկեղեցուն հավասար ազատություն, բայց հայ եկեղեցուն հավասար իրավունք չեն կարող ունենալ: Բա ո՞ր եկեղեցին է այստեղ տառապել, տուժել, պայքարել՝ իրե՞նք, ո՞ր եկեղեցին է 1700 տարի այստեղ ապրել արարել՝ իրե՞նք, ո՞նց կարող են իրենք հավասար իրավունքներ ունենալ։ Թող ուրախ լինեն, որ ունեն հավասար ազատություն, դրանից ավելի ի՞նչ են ուզում»,-նշեց նա:
Դիտարկմանը, թե ընդդիմախոսները մատնանշում են, թե Հայ Առաքելական Եկեղեցին երեխաներին տանում է տոներին մասնակցելու, սրբազանը հակադարձեց։
«Լավ են անում, եթե ծնողը տեղյակ է, իրենք ո՞վ են, որ դեմ լինեն: Վստահ չեն, որ տեղյակ է, թող վստահ լինեն: Ի՞նչ է՝ իրենք անվստահ են, մենք մեր գործը չանե՞նք, նստենք մտածենք, որ անվստահ են, իրենց անվստահությունը թող գնան, իրենց ձեռքով փարատեն»,-ասաց նա:
Հարցին, թե տեսնո՞ւմ է Հայ Առաքելական Եկեղեցուն թիրախավորելու միտում, Շիրակի թեմի առաջնորդը նշեց, թե Հայ Առաքելական Եկեղեցին գործել է իրավունքների չգոյության ու ծանր պայմաններում:
«Հիմա ի՞նչ պետք է լինի, որ ջլատեն այդ կրոնական կազմակերպությունները: Այս երկրում որևիցե այլ եկեղեցի կամ եկեղեցական կազմակերպություն չի կարող հավակնել Հայ եկեղեցու կարգավիճակին, եթե հավակնում է, ուրեմն հիվանդ է, նշանակում է հոգեկան շեղումներ ունի, բուժման կուրս պետք է անցնել»,-ասաց նա:
Սրբազանը նշեց, թե հայկական պետությունը գոյություն ունի Հայ եկեղեցու շնորհիվ:
«Եթե ժամանակին՝ 1441 թ.-ին մեր լուսավոր վարդապետները աթոռը չտեղափոխեին Էջմիածին և Էջմիածնի շուրջը չհավաքվեր, ժողովրդին որտեղի՞ց էր լինելու Հայաստան, այսօրվա Հայաստանում հայություն չէր ապրի, պետականություն չէր լինի»,-ասաց նա:
Անդրադառնալով հայ մեծանուն գրող Րաֆֆիի մեջբերմանը, թե վանքերից ծագեց մեր երկրի կործանումը, Շիրակի թեմի առաջնորդը պատասխանեց. «Րաֆֆին ընդամենը թերահավատություն է արտահայտել Հայ եկեղեցու կատարածի նկատմամբ, և իր ասածն էլ արդեն վաղուց հաստատվել էր, որ սխալվել է այդ հարցում։ Հիմա Րաֆֆին անսխալական չէր, իր գործերը բոլորս էլ կարդում, ընդունում ենք մեծ հեղինակությունը, բայց Հայ եկեղեցու մասին իր կարծիքները վաղուց քննադատության այլևս չեն դիմանում և չեն կարող մեջբերել փաստարկ Հայ եկեղեցու դեմ»:
Հարցին, թե շարունակո՞ւմ է այն կարծիքին մնալ, թե իսկական հայի տեսակը Հայ Առաքելական Եկեղեցու հետևորդն է, եպիսկոպոս Աջապահյանը պնդեց, թե անշուշտ այդպես է: «Ես դրանում համոզված եմ, դա էլ իմ իրավունքն է, ազատությունն է այդպես կարծելու: Ամեն մեկն իրավունք ունի կարծելու, թե իր հայ տեսակը լավագույնն է, ես էլ իրավունք ունեմ կարծելու, որ հայի լավագույն տեսակն Առաքելական Եկեղեցու հետևորդն է։ Դա իմ իրավունք է, իսկ երբ որևէ մեկը ասում է, թե հայ մահմեդականն էլ է հայ, իրավունք ունի ասելու, իսկ երբ ես եմ ասում, դա էլ իմ ազատությունն է: Ամեն մարդ իր պատկերացումը ունի, և բարեբախտաբար հայ ժողովրդի ճնշող մեծամասնությունը հայի տեսակը տեսնում է Առաքելական Եկեղեցու հետևորդ լինելու մեջ։ Դրանից ինչո՞ւ են ոմանք վատ զգում, հիվանդանում, տաքությունները բարձրանում»,-ասաց նա:
Իսկ թե ինչու նոր նախագծի քննարկմանը Առաքելական Եկեղեցուց ներկայացուցիչ չկար, սրբազանը պատասխանեց, թե տեղյակ չէ, բայց չի կարծում, որ դրա կարիքը կա:
«Քննարկելու ոչինչ էլ չունենք, թող հավաքվեն, քննարկեն, փորձեն Հայ եկեղեցուն հավասարվել և հետո հեռանան, պառկեն քնելու։ Ի՞նչ է եղել, ազատություն է, դեմոկրատ երկիր է, թող իրենց կարծիքը հայտնեն, գնան»,-եզրափակեց նա:
Աղբյուր՝ tert.am
