Իմ եղբայրնե՛ր, խորհրդածեք Տիրոջ կողմից ասվածների մասին:
Աջակից եղեք միմյանց՝ օգնելով ու աղոթելով, որովհետեւ գրված է. «Արդարի աղոթքը շատ ազդեցիկ է եւ օգնում է» ( Հակ. 5; 16):
Եվ եթե երկմտությամբ տարուբերվում եք տկարության ու նեղսրտության մեջ, աղոթքով հայցեք Աստծո օգնությունը, որպեսզի արժանի լինեք արդարության պտղին՝ ընդունելու հոգեւոր սերմը եւ աճեցնելու նրա հարյուրապատիկը: Տիրոջը ձեր պարտքերը հատուցելիս երեւացեք կրկնակի շահած քանքարով, ոչ թե՝ իբրեւ վատնողներ կամ քանքար թաքցնողներ: Փեսայի հետ առագաստը մտնելու պատրաստ եղեք, ոչ թե՝ հիմարության պատճառով արժանիների աջակողմյան դասին չհասած եւ այծերի հետ տրտմած: Անմահ կյանքի ժառանգորդը եղեք, ոչ թե՝ սատանայի կամակատարը. վայելչական դրախտի անմահական կյանքը վայելեցեք, ոչ թե արժանացեք խավարին ու սպասվող տանջանքներին: Դեպի հավիտենական ուրախությունը փութացեք, ոչ թե՝ ատամների կրճտումով ողբալուն:
Եթե այստեղ բարեսեր լինես, այնտեղ կհանդիպես բարիքների: Եթե այստեղ խոնարհ ու հեզ լինես, այնտեղ կժառանգես անչափ մեծություն: Այստեղ աշխատավոր լինելով՝ այնտեղ հավիտենական հանգիստ կգտնես: Այստեղ՝ տրտում, իսկ այնտեղ՝ բազմապատիկ փառքով զարդարված: Այստեղ՝ քաղցած, այնտեղ՝ հագեցած երկնային կերակրով: Այստեղ՝ շարունակ աղքատ, այնտեղ՝ վերին մեծությամբ հարստացած: Այստեղ՝ զրկված, այնտեղ՝ մեկի դիմաց տասը ստացած: Այստեղ՝ հալածված, այնտեղ՝ թագավորող: Այստեղ՝ չարչարված, այնտեղ՝ պսակված: Այստեղ՝ աղոթքով ժուժկալ, այնտեղ՝ կատարյալ պարգեւների արժանացած: Այստեղ՝ մարմնի ցանկությունները կասեցրած, այնտեղ՝ կցորդված Աստծո Հոգուն: Այստեղ՝ տեսքով հիմար, այնտեղ՝ լցված վերին իմաստությամբ: Այստեղ՝ ոչինչ չունեցող, այնտեղ ամեն ինչի տիրող: Այստեղ՝ անտուն, այնտեղ՝ երկնաքաղաքացի: Այստեղ՝ սրբասեր, այնտեղ՝ Քրիստոսի եւ սրբերի հետ: Այստեղ՝ իշխանության ու լծի ներքո, այնտեղ՝ ազատ որդիներ Վերին Սիոնի: Այստեղ՝ նեղված, այնտեղ՝ զվարթացած սրտի ընդարձակությամբ: Այստեղ՝ քաջամարտիկ, այնտեղ՝ պարգեւատրված: Այստեղ՝ բազում ճգնությունների մեջ, այնտեղ՝ սրաթռիչ թեւերով լուսերամների դասում կարգված: Այստեղ՝ ապականելին վաճառելով, այնտեղ՝ գնելով անապականը: Այստեղ՝ փախստական, իսկ այնտեղ՝ հանգստացած:
Եվ ինչպիսի՝ մեծ պատվի մասին եմ կամենում ձեզ պատմել ու հայտնել խոսքով. անբավ մեծություն, անանց ճոխություն, անիմանալի փառք, անմահական հանգիստ, անհաս բարձրություն: Հազարից մեկն իսկ չենք կարող ցույց տալ ձեզ սպասող մեծության պատիվներից, որ, ըստ առաքյալի, սկզբի հիմքն է եւ լրման ավարտը, դուք, որ եկել ժողովվել եք հավատի միաբանության մեջ եւ այս տեղերը աստվածաբնակ դարձրել, ինչի մասին Տերն ասում է. «Որտեղ երկու կամ երեք հոգի հավաքվեն Իմ անունով, այնտեղ եմ Ես՝ նրանց մեջ» (Մատթ. 18.20):
Գրաբարից փոխադրեց
Տիգրան Խաչատրյանը
Աղբյուր՝ Աղբյուր՝ «Սյունյաց Կանթեղ ամսաթերթ» #29 (63)
