Հրապարակ օրաթերթի (hraparak.am) 11/07/2023 թվակիր համարում լույս տեսած “Արթուր Դաբաղյան ԳՀՃ ուսանող” մտացածին անունով հեղինակած հոդվածի առիթով ԳՀՃ տեսչությունը հարկ է համարում նշել, որ՝
1․ Անընդունելի է հորինել ԳՀՃ-ում իբր ուսանող մեկի և այդ անվամբ ստորագրել ոչ ավել, ոչ պակաս՝ Բաց նամակ ԿԳՄՍ նախարարությանը։ Նման գործելակերպը, ցավոք սրտի, դարձել է օրինաչափություն մեր հասարակությունում, և ոչ միայն՝ ԳՀՃ-ի պարագայում։
2․ ԳՀՃ-ին տրված լիցենզավորումը վավերական է, և ԳՀճ-ն իրականացնում է բարձրագույն աստվածաբանական մասնագիտական կրթություն՝ համաձայն 2004 թ․ Պետռեգիստրում գրանցած իր կանոնադրության։
3․ ԳՀՃ-ում ներկայումս ուսանում են թվով յոթ ասպիրանտներ, իսկ 2024 թ․ արդեն նախատեսվում են ասպիրանտների գիտական թեզերի պաշտպանությունները՝ ըստ ՀՀ-ում գործող կարգի։
4․ ԳՀՃ կանոնադրության համաձայն, որը գրանցված և վավերացված է Պետռեգիստրում, ճեմարանի կառավարման մարմիններն են՝ Ամենայն Հայոց Կաթողիկոսը, որպես գիտխորհրդի նախագահ, Գիտխորհուրդը և Տեսչությունը։
5․ Որևէ ուսանող երբևէ իր բարձրացրած հարցերի ու տեսակետների համար չի հեռացվել ճեմարանից։ Ավելին, ուսանողը ոչ թե Ամենայն Հայոց Կաթողիկոսի առաջ է բարձրացնում իր մտահոգությունները և քննադատությունները, եթե այդպիսիք կան, այլ՝ ԳՀՃ տեսչի ու տեսչության առաջ։ Վերջիններս, առ ի պահանջել հարկին, կարող են այդ դիտարկումները ներկայացնել նաև Ամենայն Հայոց Կաթողիկոսին և Գիտխորհրդին։
6․ Անհասկանալի է, թե այդ ի՛նչ տեղեկություններ են անհասանելի հանրությանը․ միայն մի պարզ փաստ՝ ԳՀՃ ուսանողներին վերաբերող բոլոր կարևոր հարցերը որոշվում են ավանդաբար կիսամյակի ավարտին և ամավերջին տեղի ունեցող Մանկավարժական ժողովների ընթացքում՝ բոլոր մանկավարժների, տեսչական անձնակազմի մասնակցությամբ և Ամենայն Հայոց Կաթողիկոսի նախագահությամբ։
7․ ԳՀՃ ննջարանային մասնաշենքի վերանորոգությունը որևէ արտասովոր փաստ կամ հանգամանք չէ․ շենքն ունի ներքին հիմնանորոգման կարիք, հաշվի առնելով, որ այն վերջին անգամ վերանորոգվել է մոտավորապես 20 տարի առաջ։ Վազգենյան հոգևոր դպրանոցը, իբրև ԳՀՃ մաս, այս դեպքում ընտրված է որպես լավագույն ժամանակավոր լուծում։ Ի դեպ, այդ նպատակի համար են տեղի ունեցել և շարունակում են ընթանալ մի շարք շինարարական և այլ բարեկարգումներ Վազգենյան դպրանոցում։
8․ ԳՀՃ-ում, փառք Աստծո, չեն ուսանել և չեն էլ ուսանում այնպիսի սաներ, որոնք իրենց խնդրանքներն արտահայտում են ուրվականների և մտացածին հեղինակների շուրթերով։ Այդպիսի մանկամտություն պետք չէ վերագրել ԳՀՃ-ի նման բարձրագույն ուսումնական հաստատության սաներին․․․․
