Նոյեմբերի 8-ին Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսն այցելեց Նյու Ջերսիի Մոր Ափրամ կենտրոն, ուր հյուրընկալվեց Ասորի Ուղղափառ Եկեղեցու և Համայն Արևելքի Պատրիարք Նորին Սրբություն Մորան Մոր Իգնատիուս Աֆրեմ Բ-ի կողմից: Ամենայն Հայոց Հայրապետին ուղեկցում էին Գերաշնորհ Տ. Խաժակ արքեպիսկոպոս Պարսամյանը և Գերաշնորհ Տ. Օշական արքեպիսկոպոս Չոլոյանը:
Ասորի Ուղղափառ Եկեղեցու պետը և հոգևոր դասը կենտրոնի առջև դիմավորեցին Նորին Սրբությանը և նրա պատվիրակությանը:
Շարականի երգեցողության ներքո հովվապետերն առաջնորդվեցին Մոր Ափրամի մատուռ: Կատարվեց Ճաշու ժամերգություն, որն ավարտվեց Գարեգին Բ Հայրապետի աղոթքով:
Ի պատիվ Ամենայն Հայոց Կաթողիկոսի տեղի ունեցավ ընդունելություն: Այս կապակցությամբ Նորին Սրբություն Մորան Մոր Աֆրեմ Բ-ն իր ուրախությունը հայտնեց ի Քրիստոս հոգևոր եղբորը հանդիպելու և Մոր Ափրամ կենտրոնում ընդունելու առիթով: Իր խոսքում նա անդրադարձավ երկու Քույր Եկեղեցիների միջև առկա ջերմ հարաբերությունների պատմությանը:
Իգնատիուս Աֆրեմ Բ-ը նաև հիշատակեց երկու Եկեղեցիների հոգևորականության և հավատացելոց նահատակությունը 20-րդ դարում:
Ընդունելության ավարտին երկու հովվապետերը նվերներ փոխանակեցին ի նշան եղբայրության և հավատի միության:
Աղբյուր՝ armchurch.info
Նկարներ՝ His Holiness Patriarch Mor Ignatius Aphrem II
