21 տարի առաջ մայիսին Ապարանում վերաօծվեց և իր դռներն հավատավոր զավակների առաջ բացեց ապարանցիների ամենասիրելի սրբավայրերից մեկը՝ Սուրբ Խաչ հոյակերտ եկեղեցին:
Ավանդույթ է դարձել Սուրբ Խաչի երևման տոնին նշել եկեղեցու վերաօծման տարեդարձը: Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի բարձր տնօրինությամբ և Արագածոտնի թեմի առաջնորդ Գերաշնորհ Տեր Մկրտիչ եպիսկոպոս Պռոշյանի օրհնությամբ, այդ օրը Մայր Աթոռ Սուրբ Էջմիածնից Ապարանի Սուրբ Խաչ եկեղեցի է տեղափոխվում Հայ Առաքելական Սուրբ Եկեղեցու մեծագույն մասունքներից մեկը՝ Մեր Տեր Հիսուս Քրիստոսի Խաչափայտի սուրբ մասունքը, որի մի մասը ամփոփված է Ապարանի Սուրբ Խաչ եկեղեցու խորանի տակ:
Տոնի առիթով Մայիսի 7-ին Ապարան էր բերվել Քրիստոսի Խաչափայտի մասունքը։
Հազարավոր հավատացյալներ էին եկել Ապարան՝ մասնակցելու Սուրբ Պատարագին և ստանալու մասունքի մեծագույն օրհնությունը:
Պատարագիչն էր Մայր Աթոռ Սուրբ Էջմիածնի միաբան Հոգեշնորհ Տեր Պողոս վարդապետ Վարդանյանը:
Հայր Սուրբը Պատարագին խոսված իր քարոզում շնորհավորեց ներկաներին Երևման Սուրբ Խաչի տոնի և եկեղեցու վերաօծման տարեդարձի առիթով, ներկայացրեց օրվա խորհուրդն ու պատգամ հղեց հավատացյալներին՝ աներեր պահել իրենց հավատքը և հավելեց. «Աստվածային սիրո արտահայտությունն է այս տաճարը, երբ մտնում ես այստեղ զգում ես Աստվածային ներկայությունը…»:
Պատարագի ավարտին կատարվեց Անդաստանի կարգ:
Մասունքի մեծագույն օրհնությանը արժանանալու համար մեր որդիական խոնարհումն ենք բերում Ամենայն Հայոց Հայրապետին և Թեմակալ Առաջնորդին:
Արագածոտնի Թեմ
Ապարանի Հոգևոր Հովվություն
