Հայաստանյայց Առաքելական Սուրբ Եկեղեցու Դանիայի հայոց հոգևոր հովվությունը փետրվարի 21-ին Դանիայի Օբենրո քաղաքում կազմակերպել էր «Հայկական օր» անվանումով մեծ միջոցառում:
Միջոցառումը կատարվեց Օբենրոյի «Հոյ Կոստրուփ» եկեղեցում։ Օրը սկսվեց Ճաշու ժամերգությամբ, որից հետո Տ. Ստեփանոս քհն. Հովհաննիսյանը խոսեց Պահքի նշանակության և կարևորության, ինչպես նաև Անառակի կիրակիի մասին:
Միջոցառմանը մասնակցում էր դանիացի հայտնի գրող Քեյթ Ռոսթերը:
Ժամերգությունից և քարոզխոսությունից հետո Քեյթ Ռոսթերը և հայ թարգմանչուհի Հասմիկ Կուրղինյանը հայերեն և դաներեն լեզուներով ընթերցեցին Քեյթ Ռոստերի «Պատկերներ Հայաստանից և Արցախից» օրագիրը, որը հեղինակը գրել էր 2014 թվականին Հայաստան և Արցախ այցելությունների ժամանակ:
«Պատկերներ Հայաստանից և Արցախից» օրագիրը հրատարակվել է «Գրական Տապան» տարեգրքում:
Հայկական հայտնի երգերի կատարումներով հանդես եկավ հայազգի կիթառահար Վահան Սադոյանը:
Կազմակերպվել էր նաև ցուցահանդես, որտեղ ներկայացված էին Ք. Ռոսթերի և Հասմիկ Կուրղինյանի հեղինակած ու թարգմանած գրքերը և հայ նկարչուհի Ալբինա Հարությունյանի նկարները:
Ա. Հարությունյանի նկարների ցուցադրությունից հետո մասնակիցներին ներկայացվեց նաև հայկական խոհանոցը՝ իր մեծ տեսականիով:
Միջոցառմանը մասնակցում էին շուրջ 60 հայեր և դանիացիներ տարբեր քաղաքներից:
