Հունվարի 6-ին` մեր Տեր և Փրկիչ Հիսուս Քրիստոսի Սուրբ Ծննդյան և Աստվածհայտնության տոնին, Մայր Աթոռ Սուրբ Էջմիածնում` Մայր Տաճարում, Սուրբ և Անմահ Պատարագ մատուցեց Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը:
Սուրբ Պատարագի արարողությանը ներկա էին ՀՀ նախագահ Սերժ Սարգսյանը, ՀՀ ԱԺ նախագահ Գալուստ Սահակյանը, ՀՀ վարչապետ Հովիկ Աբրահամյանը, պետական բարձրաստիճան այլ պաշտոնյաներ, Գերագույն Հոգևոր Խորհրդի անդամներ, Հայաստանում հավատարմագրված օտարերկրյա դիվանագետներ, հասարակական գործիչներ, կրթության, գիտության և մշակույթի ներկայացուցիչներ:
Այս տարի Հայրապետական ամպհովանին թափորի ընթացքում Ամենայն Հայոց Կաթողիկոսի և Հայաստանի Հանրապետության նախագահի գլխավերևում կրում էին «Իզմիրլյան» բժշկական կենտրոնի տնօրեն բ.գ.դ., պրոֆեսոր Արմեն Չարչյանը, Մայր Աթոռի գլխավոր ճարտարապետ Արա Վարդանյանը, ՀՀ վաստակավոր արտիստ Հրանտ Թոխատյանը և Գևորգյան հոգևոր ճեմարանի ուսումնական գծով փոխտեսուչ բ.գ.թ. Գևորգ Մադոյանը:
Նորին Սրբությանը որպես առընթերականեր սպասավորում էին Մայր Աթոռի լուսարարապետ Տ. Հովնան եպիսկոպոս Հակոբյանը և Մայր Աթոռի Վարչատնտեսական բաժնի տնօրեն Տ. Մուշեղ եպիսկոպոս Բաբայանը:
Հրաշափառ Ս. Ծննդյան պատարագի ընթացքում Ամենայն Հայոց Կաթողիկոսը շնորհավորեց եկեղեցականաց դասին և աշխարհասփյուռ հայ ժողովրդին և տոնի առիթով ամենքին հղեց իր հայրապետական պատգամը:
Ս. Պատարագի ավարտին Ամենայն Հայոց Կաթողիկոսը կատարեց նաև Ջրօրհնեքի արարողությունը: Այս տարի Մայր Տաճարում ջրօրհնեքի Խաչի կնքահայրն էր ռուսաստանաբնակ ազգային բարերար Սամվել Կարապետյանը:
Ս. Պատարագից հետո «Ալեք և Մարի Մանուկյան» Գանձատանը տեղի ունեցավ պաշտոնական ընդունելություն, որտեղ Վեհափառ Հայրապետը ներկաներին վերստին փոխանցեց Տիրոջ Ս. Ծննդյան հրեշտակաբարբառ ավետիսը:
