Արարատյան Հայրապետական թեմի ներքո գործում է «Ցերեկային կենտրոն», որը զբաղվում է ՄԻԱՎ վարակակիրներով, թմրամոլներով, աշխատում նրանց ընտանիքների անդամների հետ: Կենտրոնի հոգեւոր պատասխանատուն Սուրբ Զորավոր եկեղեցու հոգեւոր հովիվ տեր Գրիգոր քահանա Գրիգորյանն է: Aravot.am-ի հետ զրույցում տեր Գրիգորը թմրամոլությունը ոչ թե հիվանդություն որակեց, այլ կիրք՝ ուժեղ, անսանձելի ցանկություն: «Դա հատուկ կիրք է, այն արհեստական է, բայց իր հոգուն եւ մարմնին այնքան հարազատ, որ ասես դարձել է իր մի մասը: Մարդը սթափ հասկանում է, որ այս կիրքը իր մեջ կլինի մինչև կյանքի վերջ և մինչև կյանքի վերջ էլ նա ստիպված է պայքարել դրա հետ: Բայց Եկեղեցում նրան տրված է ամեն ինչ` այս պայքարում հաղթող դուրս գալու համար` հաղորդության խորհուրդ, խոստովանանք, ապաշխարություն և երանելի աստվածային օգնություն»,-ասաց հոգեւորականը: Քանի որ դեկտեմբերի 1-ը նշվում է որպես ՁԻԱՀ-ի դեմ պայքարի համաշխարհային օր, հետաքրքրվեցինք, թե ինչ ուղերձ կհնչեցնի այդ առիթով: «Ես ավելի լավ ուղերձ չեմ կարող հնչեցնել, քան ավետարանական այն խոսքը, որտեղ ասվում է՝ «Երդվում եմ ձեզ երկնքով ու երկրով, որ ձեր առջևն եմ դնում կեանքն ու մահը, օրհնություններն ու անեծքները։ Ընտրի՛ր կեանքը, որպեսզի ապրեք դու և քո սերունդը։ Պետք է սիրես քո Տեր Աստծուն, լսես Նրա ասածը, կապված մնաս նրան, որովհետև Նա է քո կյանքն ու քո երկարակեցությունը… »,-ասաց քահանան:
Գոհար ՀԱԿՈԲՅԱՆ
Ամբողջական հոդվածը կարող եք կարդալ այս հասցեով՝ www.aravot.am
