Ապրիլի 16-ին Մայր Աթոռ Սուրբ Էջմիածնում` «Վաչէ եւ Թամար Մանուկեան» մատենադարանում, Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսն ընդունեց Պօէզիայի առաջին միջազգային փառատօնի մասնակիցներին` ուղեկցութեամբ Հայաստանի գրողների միութեան նախագահ Լեւոն Անանեանի: Ողջունելով փառատօնի մասնակիցների այցը համայն հայութեան հոգեւոր կենտրոն` Վեհափառ Հայրապետն իր օրհնութիւնն ու բարեմաղթանքները բերեց ներկաներին:
Նորին Սրբութիւնն իր գնահատանքը յայտնեց Հայաստանի գրողների միութեան նախագահին Երեւանում Պօէզիայի միջազգային առաջին փառատօնի կազմակերպման, ինչպէս նաեւ փառատօնը հայոց նուիրական սրբավայր այցելութեամբ սկսելու համար:
Վեհափառ Հայրապետը, իր խօսքում անդրադառնալով պօէզիայի բարձր կոչմանը, յորդորեց պօէզիայի մշակներին իրենց աստուածաշնորհ կարողութիւններն ի բարին ծառայեցնել` մարդկութեան բարօրութեան, ժողովուրդների միջեւ բարեկամութեան կերտման համար:
Հանդիպման վերջում Ամենայն Հայոց Կաթողիկոսը պատասխանեց տարբեր երկրներից ժամանած գրողներին հետաքրքրող հարցերին:
