Հրապարակ թերթում, ապա և կայքէջում մարտի 26-ին լույս տեսած «Մայր Աթոռը վարկային կազմակերպության «փայատեր» Է» առնչությամբ հարկ ենք համարում պարզաբանել հետևյալը:
Մայր Աթոռ Սուրբ Էջմիածինը և Ն.Ս.Օ.Տ.Տ. Գարեգին Բ Ամենայն Հայոց Կաթողիկոսը երբևէ ո՛չ ԷԿԼՕՖ հիմնադրամի և ո՛չ էլ ԷԿԼՕՖ ՈՒՎԿ ՍՊԸ-ի ուղղակի և անուղղակի հիմնադիր և բաժնետեր չեն հանդիսացել:
ԷԿԼՕՖ-ը աշխարհի 20 երկրներում գործող միջազգային էկումենիկ միկրոֆինանսական կազմակերպություն է` հիմնադրված Շվեյցարիայում 1946 թվականին, որը 2002 թվականին Հայաստանում հիմնադրել է ԷԿԼՕՖ հիմնադրամը, որի միջոցով իրականացրել է իր միկրոֆինանսական ծրագրերը: 2006 թվականից հիմնադրվել է ԷԿԼՕՖ ունիվերսալ վարկային կազմակերպություն ՍՊԸ, որի միջոցով շարունակվել են իրականացվել միկրովարկային ծրագրեր: ԷԿԼՕՖ հիմնադրամի միակ հիմնադիրը հանդիսանում է ԷԿԼՕՖ միջազգայինը, ԷԿԼՕՖ ՈՒՎԿ ՍՊԸ-ի 27.2 տոկոսը պատկանում է ԷԿԼՕՖ միջազգայինին, իսկ 72.8 տոկոսը իր կողմից հիմնադրված ԷԿԼՕՖ հիմնադրամին:
Մայր Աթոռի առնչությունը ԷԿԼՕՖ-ի հետ, իբրև էկումենիկ կազմակերպության, եղել է այնքանով, որքանով որ տարբեր Քրիստոնեական Եկեղեցիներինը և հարանվանություններինը: Մայր Աթոռ Ս. Էջմիածինը երբևէ չի տնօրինել ԷԿԼՕՖ-ի միջոցներն ու եկամուտները: Լինելով էկումենիկ միջազգային կազմակերպության հայաստանյան գրասենյակ, ինչպես պարագան է այսօր ԵՀԽ Հայաստանյան կլոր սեղան միջեկեղեցական հիմնադրամի, անցյալում` նաև Ջինիշյան հիշատակի հիմնադրամի, այն նախկինում ժամանակավորապես տեղակայվել է Մայր Աթոռի տարածքում:
