Այս տարվա փետրվար ամսին Հայ Եկեղեցու Երիտասարդաց Միավորման (ՀԵԵՄ) Հյուսիսային Ամերիկայի տարածաշրջանային ժողովի տրամաբանական շարունակությունն էր սույն թվականի փետրվար 19-20-ը Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի օրհնությամբ Բուխարեստում տեղի ունեցած ՀԵԵՄ Եվրոպայի տարածաշրջանային ժողովի առաջին փուլը, որին մասնակցում էին Հայ Առաքելական Սուրբ Եկեղեցու Ռումինիայի, Բուլղարիայի, Հունաստանի, Ուկրաինայի Հայոց թեմերի, ինչպես նաեւ Ռումինիայի երիտասարդական միությունների, մասնավորապես Ռումինիայի Հայոց թեմի երիտասարդաց միության եւ Ռումինիայի Հայոց միության երիտասարդական թեւի տասնյակ ներկայացուցիչներ: Ժողովը նախագահում էր ՀԵԵՄ հոգեւոր պատասխանատու, Հյուսիսային Ամերիկայի Արեւմտյան թեմի առաջնորդ Բարձրաշնորհ Տեր Հովնան արքեպիսկոպոս Տերտերյանը, ում գլխավորած պատվիրակության մեջ էին ՀԵԵՄ Եվրոպայի տարածաշրջանային պատասխանատու, Իտալիո Հայոց հոգեւոր հովիվ Հոգեշնորհ Տեր Թովմա աբեղա Խաչատրյանը եւ ՀԵԵՄ Կենտրոնական գրասենյակի տնօրեն պրն. Գեւորգ Մկրտչյանը: Ժողովի պաշտոնական բացմանը ներկա գտնվեց եւ ողջույնի խոսք ասաց Ռումինիայում ՀՀ դեսպան Տիար Համլետ Գասպարյանը: Երկօրյա ժողովը հյուրընկալեց Ռումինիայի Հայոց թեմը՝ առաջնորդությամբ Գերաշնորհ Տեր Տաթեւ եպիսկոպոս Հակոբյանի:
ՀԵԵՄ Եվրոպայի տարածաշրջանային ժողովի երկրորդ փուլը տեղի ունեցավ Գերմանիայի մայրաքաղաք Բեռլինի Հայոց տանը փետրվար 20-21-ը: Ժողովների հյուրընկալությունը ստանձնել էր Գերմանիայի թեմի առաջնորդությունը թեմի առաջնորդ Գերաշնորհ Տեր Գարեգին արքեպիսկոպոս Բեկչյանի: Կոնֆերանսի այս փուլին մասնակցում էին Գերմանիայի տարբեր համայնքներում գործող երիտասարդական կառույցների, ինչպես նաեւ Հոլանդիայի, Բելգիայի, Նորվեգիայի, Շվեդիայի, Դանիայի, Ֆինլանդիայի տասնյակ երիտասարդ ներկայացուցիչներ:
ՀԵԵՄ Եվրոպայի տարածաշրջանային կոնֆերանսը եզրափակվեց երրորդ փուլով Իտալիայի Հայոց հովվության կենտրոն Միլանի Սուրբ Քառասուն մանկունք եկեղեցում: Ժողովին մասնակցում էին Ալբանիայի, Ֆրանսիայի, Ավստրիայի, Շվեյցարիայի, Իսպանիայի, Պորտուգալիայի, ինչպես նաեւ Իտալիայի 8 համայնքների երիտասարդ ներկայացուցիչներ եւ մասնակիցներ: Ժողովին ողջույնի խոսքով հանդես եկավ Միլանում ՀՀ պատվո հյուպատոս Տիար Պետրոս Քուչուկյանը: Կոնֆերանսի մասնակիցները ժողովական կյանքը սկսեցին Սուրբ եւ Անմահ կիրակնօրյա Պատարագով, ապա եկեղեցու հանդիսությունների սրահում ժողովականներին հայկական պարերով ողջունեց Միլանի հայոց համայնքի պարի խումբը:
Բուխարեստում, Բեռլինում եւ Միլանում տեղի ունեցած ժողովների հիմնական նյութերն էին՝
ա. ՀԵԵՄ պատգամավորական Գ ժողովը, որը պետք է գումարվի Հայաստանում սույն տարվա հուլիս 1-5-ը,
բ. ՀԵԵՄ կանոնադրության կամ կանոնակարգի վերջնական տարբերակը եւ ՀԵԵՄ բյուջեն,
գ.Միջթեմական համագործակցությունը հայաստանյան թեմերի եւ Հայ Եկեղեցու արտասահմանյան ներկայացուցչությունների միջեւ քույր թեմերի ավանդության ձեւավորման սկզբունքով,
դ.Եվրոպայում հայի ինքնության պահպանումը, որի առնչությամբ ժողովը նախագահող Բարձրաշնորհ Հովնան սրբազանը թելադրեց երիտասարդներին մշակել մի ծրագիր 2016 թվականի աշնանը իրականացնելու համար Եվրոպայի բոլոր թեմերի եւ հովվությունների համատեղ ջանքերով:
ե. Հաջորդ տարածաշրջանային ժողովի թվականի ճշգրտումը եւ նշանակումը, ըստ որի ՀԵԵՄ Եվրոպայի տարածաշրջանային հաջորդ ժողովը տեղի կունենա 2016 թվականի փետրվարին:
Նշենք, որ փետրվար 27-ից մինչեւ մարտի 1-ը ՀԵԵՄ տարածաշրջանային ժողովը կհյուրընկալի Ռուսաստանի եւ Նոր Նախիջեւանի թեմը՝ առաջնորդությամբ թեմի առաջնորդ Բարձրաշնորհ Տեր Եզրաս արքեպիսկոպոս Ներսիսյանի:
ՀԵԵՄ մամլո դիվան
