Արևմտյան Հայաստանի Դերսիմ և Տիգրանակերտ գավառից Համահայկական 6-րդ ամառային խաղերին մասնակցելու համար Երևան եկած ծպտյալ հայերը ցանկություն են հայտնել Հայաստանում մկրտվելու: Սակայն, նրանց մկրտվելու ջանքերն ապարդյուն են անցել, որը հայաստանյան լրատվական դաշտում առաջ է բերել քննադատությունների մեծ ալիք: Հարցի վերաբերյալ Hayeli.am-ը դիմեց Մայր Աթոռ Սուրբ Էջմիածնին, որտեղից ստացված պարզաբանումը ներկայացնում ենք ստորև.
Զաքարիա վրդ. Բաղումյան
Մայր Աթոռ Սուրբ Էջմիածնի
Տեղեկատվական համակարգի տնօրենի պաշտոնակատար
Անհարկի և սխալ մեկնաբանություններից խուսափելու համար հարկ ենք համարում ևս մեկ անգամ պարզաբանել Արևմտյան Հայաստանից ժամանած երեք անձերի Ս. Մկրտությանն առնչվող հարցերը: Հայոց Եկեղեցու Ս. Ավազանում կարող են մկրտվել ազգությամբ հայեր և հայի հետ ամուսնացած օտարազգիներ, բացառիկ դեպքերում` նաև այլադավաններ կամ օտարներ, ովքեր սահմանված կարգով անցել են նախապատրաստական շրջանը և պատրաստ են Ս. Մկրտությանը: Բնականաբար, Ս. Մկրտության նույն գործընթացն է կատարվում նաև իսլամացած հայերի դեպքում: Պետք չէ այս խնդրին մոտենալ զգացականությամբ, քանզի իսլամացած հայերին մկրտելու հարցն առավել կարևոր է նաև ազգային-հոգևոր անվտանգության տեսանկյունից, ուստի եկեղեցին նաև որոշակի զգուշավորություն է ցուցաբերում նրանց մկրտելու հարցում` վստահ լինելու համար, որ նրանք իսկապես ազգությամբ հայեր են, և ամենակարևորը` պատրաստ են Ս. Մկրտության խորհուրդն ընդունելու: Ս. Մկրտությունը շոու չէ, և այն կարող է կատարվել միայն դարերով հաստատված Հայոց Եկեղեցու կարգ և կանոնի համաձայն: Հաշվի առնելով, որ Արևմտյան Հայաստանից ժամանածները Կ. Պոլսի Հայոց Պատրիարքության հոգևոր իշխանության ներքո են, նրանց խորհուրդ է տրվել դիմել Պատրիարքարան և անցնել Ս. Մկրտության համար նախատեսված գործընթացը: Պատրիարքարանի կողմից նրանց ինքնության և խորհրդին պատրաստ լինելու հաստատումից հետո Ս. Մկրտությունը կարող է կատարվել հայկական որևէ եկեղեցում: Այլ խոսքով` Մայր Աթոռ Ս. Էջմիածինը ոչ թե մերժել է նրանց, այլ ցույց է տվել այն ճանապարհը, որի արդյունքում կկատարվի Ս. Մկրտության խորհուրդը: Ի վերջո` եթե մեկը ցանկանում է իսկապես մկրտվել, դառնալ քրիստոնյա և տվյալ դեպքում Հայոց Եկեղեցու անդամ, ապա սիրով ենթարկվում է նաև Հայոց Եկեղեցու կարգ ու կանոնին:
Աղբյուր՝ hayeli.am
