Ամեն մարդ կյանքում ձգտում է ունենալ երեք կարևոր արժեքներ՝ ճշմարտություն, բարություն և գեղեցկություն:
ճշմարտությունը իբրև մարդու խոսքի ու գործի միջև ճշտություն, կոչվում է ճշմարտախոսություն, անկեղծություն կամ ուղղամտություն; Արդարև Սուրբ Գիրքը վկայում է, թե Աստված ակունքն է ամեն ճշմարտության: Իրապես ճշմարտությունը Աստծու խոսքն է և Աստված ճշմարտությունն է: Հիսուսին հավատալ նշանակում է մնալ Նրա խոսքի մեջ ճշմարտությունը ճանաչելու համար: Եվ Հիսուս սովորեցնում է ճշմարտության անպայմանավոր հրամայականը· «Ձեր խօսքը թող լինի այո-ն՝ այո’, և ոչը՝ ոչ»: Մարդը բնականաբար ձգտում է ճշմարտության և հասնում նրան իր արժանապատվության զորությամբ: Ճշմարտության հասնելու և նրա մեջ մնալու համար պահանջվում է քաջություն և հերոսություն:
Ամեն մարդ, ուր որ էլ ապրի, ինչ պայմաններում էլ, որ լինի, պարտավոր է իր կյանքի օրինակով ու իր խոսքի վկայությամբ ցույց տալու ճշմարտությունը, պարկեշտությունն ու անկեղծությունը:
Բարոյական գեղեցկությունը և բարիքի գործադրությունը ընկերակցում են ճշմարտությանը: Այս պատճառով Աստծու պատկերով ստեղծված մարդը Նրա հետ ճշմարտության կապը արտահայտում է նաև իր գեղարվեստական գեղեցկությամբ: Այս ուղղությամբ արվեստը ճշմարիտ է և գեղեցիկ, երբ իր ծնունդով համապատասխանում է հատուկ կոչման, որ է՝ հավատքով ու երկրպագությամբ հիշել և փառավորել Աստծու գերակա խորհուրդը; Այն գեղեցկությունն է վսեմ անտեսանելի ճշմարտության, սիրո ու պայծառությունը Աստծու փառքի: Արվեստը ձգտում է Աստծու անհուն գեղեցկության և օժանդակելու մարդկային հոգիների դարձը դեպի Աստված:
Ուրեմն ճշմարտությունը, բարությունն ու գեղեցկությունը իրար հետ կապված են և կախում ունեն իրարից:
Տարիքով մի կնոջ հարց է տրվել, թե նա ի՞նչ է օգտագործում իր դեմքը այդքան գեղեցիկ ու իր կեցվածքը այնքան առողջ և գրավիչ պահելու համար:
Նա ժպտալով պատասխանել է·
ա· Շրթունքներիս համար օգտագործում եմ՝ ՃՇՄԱՐՏՈՒԹՅՈՒՆ;
բ· Ձայնիս՝ ՔԱՂՑՐՈՒԹՅՈՒՆ;
գ· Աչքերիս՝ ԳՈՒԹ
դ· Ձեռքերիս՝ ՈՂՈՐՄՈՒԹՅՈՒՆ:
ե· Տեսքիս՝ ՊԱՐԿԵՇՏՈՒԹՅՈՒՆ:
զ· Սրտիս՝ ՍԵՐ:
է· Եվ բոլոր նրանց համար, որոնք ինձ չեն սիրում՝ ԱՂՈԹՔ:
Արժի՞ արդյոք գեղեցկության այս ծրագիրը գործադրել: Ի՞նչ եք կարծում՝ կօգնի՞ այն գեղեցիկ լինելու համար: Ես գտնում եմ, որ՝ այո’, արժի: Հավատացեք այս ծրագիրը օգտագործելուց հետո, դուք կարճ ժամանակից պիտի զգաք զգալի փոփոխություն ձեր կյանքից ներս: Եթե իրական գեղեցկություն եք փնտրում և ուզում եք գեղեցիկ լինել՝ փորձեցեք ՃՇՄԱՐՏՈՒԹՅՈՒՆԸ, ՔԱՂՑՐՈՒԹՅՈՒՆԸ, ԳՈՒԹԸ, ՈՂՈՐՄՈՒԹՅՈՒՆԸ, ՊԱՐԿԵՇՏՈՒԹՅՈՒՆԸ, ՍԵՐՆ ՈՒ ԱՂՈԹՔԸ: Աստված ձեզ հետ:
Գրառում՝ Տ. Հովսեփ Ա. Քահանա Հակոբյանից
