Եկեղեցու հետ չեն քննարկում, եկեղեցու թիկունքում որոշում են կայացնում ՝ նույնիսկ խախտելով երկրի օրենքը. «Հայ եկեղեցու պատմություն» առարկայի դասավանդումը օրենսդրական հիմնավորում ունի, հիմա փաստորեն օրենք են խախտում: Այս մասին Tert.am-ի հետ զրույցում ասաց Շիրակի թեմի առաջնորդ, գերաշնորհ Տ․ Միքայել Արքեպիսկոպոս Աջապահյանը՝ անդրադառնալով «Հայ եկեղեցու պատմություն» առարկայի՝ կրթական նոր չափորոշչից և ծրագրերից դուրս բերելուն և այլ առարկաների մեջ ներմուծելուն:
Անդրադառնալով դիտարկմանը, որ հնչում են տեսակետներ, թե սա եկեղեցու դեմ արշավի տրամաբանական շարունակությունն է, Սրբազանն ասաց.
«Եկեղեցին իր ստեղծման օրվանից արշավների է դիմակայում, այնպես որ այդպիսի արշավներ կլինեն, կանցնեն, դեռ չի գտնվել ուժ, որ կարողացել է եկեղեցուն հաղթել և չի գտնվի նման ուժ, որովհետև եկեղեցին ղեկավարվում է ոչ թե մարդկանց կողմից, ինչպես շատերը ցանկանում են տեսնել, այլև Աստծո կողմից, իսկ Աստծոն ոչ ոք չի կարող հաղթել:
Եկեղեցին կշարունակի իր ընթացքը 22-րդ, 23-րդ դարում էլ, մինչև Քրիտոսի երկրորդ գալուստը կհասնի: Բոլոր տեսակի իշխանությունները գնացել են, եկեղեցին մնացել է, էս իշխանությունն էլ կանցնի եկեղեցին կմնա, պիտի մտածեն այնպես գործեն՝ որպեսզի անեծքի տակ չըկնեն, ոչ միայն ժողովրդի անեծքի, այլև Աստծո»,-ասաց նա:
Սրբազանի խոսքով ՝ մենք չենք ունենա գրագետ, քրիստոնեական արժեքներով սնված սերունդ, չնայած նրան, որ մենք՝ իբրև առաջին քրիստոնյա, կոչված ենք դառնալու քրիսոնեության ջահակիրը:
«Կունենանք սերունդ, որը 13-րդ դարի եկեղեցու վրա կշարունակի փորագրել մեխով իր անունը գրելով, որ ասենք ՝ Սերոժը սիրում է Աստղիկին: 13-րդ դարի տաճարը իր համար արժեք չի ունենա, որովհետև ինքը չի հասկանա դրա նպատակն իր կյանքում: Կունենանք այն նույն սերունդը, ինչը ունեինք 70 տարի, կարծես վատ սերունդ չէր, բայց մի հսկայական ժառանգության մասին չգիտեր, տեղյակ չէր և այդ ժառանագության կրողը չէր: Հիմա, եթե ուզում ենք վերադառնալ նույն ելակետին, թող վերադառնան, իսկ եկեղեցին դարձյալ կշարունակի իր առաքելությունը՝այսպես թե այնպես»,-ասաց նա:
Աղբյուր` www.tert.am
