Շուրիշկանի Ավետարանը

Ամեն տարի սուրբ Զատիկին հաջորդող կիրակի օրը՝ Կրկնազատիկին, հաստատված ավանդույթի համաձայն, Մեսրոպ Մաշտոցի անվան Մատենադարանից դուրս է բերվում և մեծ թափորով Արագածոտնի թեմի Մուղնու Սբ. Գևորգ եկեղեցի է տարվում Շուրիշկանի Սուրբ Ավետարանը, և այնտեղ մնում մինչ ուշ երեկո՝ իր հրաշագործություններին հաղորդակից դարձնելով հավատավոր ժողովրդին: Մատուցվող Սբ. Պատարագի ընթացքում վերջիններս հնարավորություն են ունենում համբուրելու Սբ. Ավետարանը և ստանալու նրա հրաշագործ օրհնությունը։