Հելոուինը նվազեցնում է մեր բարեպաշտությունը

Helloween 12 880x660 - Հելոուինը նվազեցնում է մեր բարեպաշտությունը

Առաջիկա շաբաթ օրը՝ հոկտեմբերի 31-ին Երևանում էլ պատրաստվում են տոնել հելոուինը: Մայրաքաղաքի հատկապես կենտրոնում գտնվող խանութներից շատերի ցուցափեղկերին տոնի համար նախատեսված դիմակներ են փակցված: Վերջին տարիներին Հայաստանում էլ սկսել են «տոնել» այն:
«Հայ Առաքելական Սուրբ Եկեղեցին ամեն անգամ բազմաթիվ առիթներով, տարբեր եկեղեցականների միջոցով հայ ժողովրդին տեղեկացնում է և հորդորում, որ այդ օտարածին տոներն այնքան էլ բարի չեն»,-Panorama.am-ի հետ զրույցում ասաց Տեր Համբարձում քահանա Դանիելյանը:

Նա նկատել է, որ վերջին տարիներին հայերիս մեջ հսկայական տարածում ունի օտար տոներին նվիրվելու անհասկանալի ձգտումը:

«Զարմանալին թերևս այն է, որ այդ տխրահռչակ գործընթացին ընթացք տվողներն անգամ տարրական գաղափար չունեն, թե իրենք ինչպիսի կործանարար բովանդակություն ունեցող տոների են մասնակցում: Այս «ախտով վարակված»` մեծ թվով հայեր իրենց հոգեհարազատ են համարում երկրագնդի արևելյան և արևմտյան հատվածներում տարածված մի շարք տոներ, որոնք, համաձայն վերջիններիս կարծիքի, գեղեցիկ են, բարի են և հաճելի տրամադրություն են ստեղծում»,-նշեց քահանան:

Նրա խոսքով, եթե նրանք այդ տոները տոնում են բարի մղումներից ելնելով, դա դեռ չի նշանակում, որ այդտեղ թագավորում է բարությունը. «Մեր եկեղեցու տոները քի՞չ են, չե՞ն բավականացնում…Ես վստահ եմ, որ եթե մենք հետևողական լինենք Հայ Եկեղեցու որդեգրած ավանդույթներին ու տոներին, ժամանակ չենք ունենա անգամ մտածելու այլ տոների մասին»:

Տեր Համբարձումը մտավախություն ունի, որ մի քանի օրից մեզանից շատերը, հավանաբար, դարձյալ կտարվեն այդպիսի տոներից մեկով, որը հանրության մեջ հայտնի է Հելոուին անունով. «Իռլանդական և Շոտլանդական ծագում ունեցող այս չարաբաստիկ երևույթը, որ մատնացույց է անում չարին, ձգտում է ձևախեղել շատ քրիստոնյաների՝ նրանց զգեստավորելով սատանայական հագուստներով և կերպարանքներով: Չէ՞ որ կախարդների, վհուկների, ուրվականների, վամպիրների, կմախքների և սատանաների տեսքերով տարբեր դիմակներ և զգեստներ կրելն այս տոնի պարտադիր պայմաններից մեկն է»:

Եկեղեցականը հիշեցրեց Սուրբ գրքում գրվածի մասին. «Սուրբ Գիրքը Պողոս Առաքյալի բերանով մեզ խրատում և ասում է. «Եվ Սուրբ Հոգին հայտնապես ասում է, թե վերջին ժամանակներում ոմանք պիտի հեռանան հավատից և իրենց ուշադրությունը պիտի դարձնեն մոլորեցնող ոգիների վրա և դևերի վարդապետությունների վրա՝ տարված ստախոսների կեղծավորությամբ, որոնց խղճմտանքը խարանված է…» (Ա Տիմոթեոս 4.1,2)»: Ուրեմն` եկե՛ք հեռու մնանաք չարություններից, կախարդություններից և սատանայություններից, միասին ոչ ասենք այդ չարաբաստիկ տոներիին և հորդորենք մեր ընկերներին ու հարազատ մարդկանց հեռու մնալ անբովանդակ տոներից»:
Նշենք, որ կախարդների, վհուկների, ուրվականների, վամպիրների, կմախքների և սատանաների տեսքով տարբեր դիմակներ և զգեստներ կրելն այս տոնի պարտադիր պայմաններից մեկն է։ Տարածված են սարսափ գրականության, ինչպես նաև սարսափ-ֆիլմերի հերոսների զգեստները։ Տների ձևավորման ժամանակ օգտագործվում են աշնանային մոտիվները, օրինակ՝ գյուղական խրտվիլակները։ Հելոուինի հիմնական թեմաներն են մահը, չարը, կախարդությունը և հրեշները։ Ավանդական գույներ են նարնջագույնն ու սևը։
Տոնի գլխավոր խորհրդանիշը համարվում է, այսպես ասած, Ջեքի ճրագը Այն դդում է, որի վրա փորագրված է չար, բայց միևնույն ժամանակ ծիծաղելի դեմք, իսկ դդմի ներսում տեղադրված է վառվող մոմ։ Հելոուինի ժամանակ քաղցրավենիք խնդրելն ընդունված է, որն անում են զգեստավորված երեխաները։ Նրանք այցելում են տնից տուն, որպես հյուրասիրություն խնդրում են կոնֆետներ (որոշ տեղերում` փող) հարցնելով՝ “Trick or treat?” (Խորամանկություն թե՞ հյուրասիրություն)։

Աղբյուր՝ www.panorama.am